Kontinänt

Kontinent (vu lat. (terra) continens, wertlig Land, wu zämmehangt) haißt mer gschlosseni Feschtlandmasse.

Wältcharte vu dr Ozean un dr Kontinänt (Bildmontasche us Satellitenufnahme)

D Kontinänt vu dr Ärd mache insgsamt 29,3 Brozänt vu dr Ärdoberfleichi uus, dr Räscht nämme d Ozean, Meer un Insle yy.

Definition

Topographisch verstoht mer unter eme Kontinänt e großi Landmasse, wu zämmehangt un dur Wasser oder anderi natyrligi Gränze ganz oder zmindescht fascht ganz abgränzt isch. Zem Byschpel wäre Landmasse, wu nume dur e schmali Landängi verbunde sin (wie Afrika un Asie) zmaischt as verschideni Kontinänt aagsääne.

Ärdplatte

Geologisch umfasst e Kontinänt au s Schelfbiet, wu derzue ghert, also dr Feschtlandssockel im Flachmeer. Di lychter kontinäntal Ärdkruschte, wu au d Feschtlandssockel derzue ghere, unterschaidet sich mit ere gringere Dichti vu 2,7 g/cm³ un ere andere chemische Zämmesetzig vu dr ozeanische Kruschte, wu ne mittleri Dichti vu rund 3,0 g/cm³ ufwyst.

Näbe däne bdoode git s au ne historisch-bolitischi Definition. Doderno isch e Kontinänt e groß Biet, wu us andere, zem Byschpel sozio-kulturälle Grind vu andere Großbiet vu dr Ärd z untersschaide isch. Wäg däre historisch-bolitische Perschpektive wird Europa as Kontinänt definiert, drotz ass es no dr erschte boode Definitione kai aigene Kontinänt wär.

D Verdailig vu dr Landmasse uf dr Ärd isch ständig im Wandel. D Kontinänt sin wäg dr Blattetektonik alliwyl in Bewegig un hän sich in dr Ärdgschic hat scho ne baarmol zue aim Superkontinänt veraint un sin derno wider in chlaineri Kontinänt usserander broche.

Verglych vu dr Greßine, Yywohnerzahle un Oberflechine vu dr Kontinänt

Flechi un absoluti Bevelkerigszahl im Verglych

Nr.	Kontinänt	Greßi [Mio.km²]	Yywohner [Mio.]	% vu dr Ärdoberflechi	% vu dr Wältbevelkerig
1	Asie	44,4	4010	8,7	60,5
2	Afrika	30,3	944	5,9	14,2
3	Nordamerika	24,9	523	4,9	7,9
4	Sidamerika	17,8	381	3,5	5,8
5	Antarktika	13,2	0	2,6	0
6	Europa	10,5	733	2,1	11,1
7	Auschtralie/Ozeanie	8,5	34	1,7	0,5
	Gsamt	149,6	6.625	29,3	100

Aazahl vu dr Kontinänt

Dr Herodot het d Wält urspringli in drei Kontinänt ufdailt: Europa, Asie un Libye (Afrika). Syyni Dreidailig isch im gsamte Altertum un Mittelalter gängig gsii.

Syt in dr Neizyt no mee Kontinänt entdeckt wore sin, git s verschideni Aasichte iber d Aazahl, vor allem iber Zellig vu Europa un Asie un vu Nord- un Sidamerika.

Hite gängigi Modäll vu dr Kontinänt
7 Kontinänt:	Antarktika	Nordamerika	Sidamerika	Europa	Asie	Afrika	Auschtralie
6 Kontinänt:	Antarktika	Amerika		Europa	Asie	Afrika	Auschtralie
	Antarktika	Nordamerika	Sidamerika	Eurasie		Afrika	Auschtralie
		Nordamerika	Südamerika	Europa	Asie	Afrika	Auschtralie
5 Kontinente:	Antarktika	Amerika		Eurasie		Afrika	Auschtralie
		Amerika		Europa	Asie	Afrika	Auschtralie
4 Kontinente:	Antarktika	Amerika		Afrika-Eurasie			Auschtralie

Weblink

 Commons: Kontinente – Sammlig vo Multimediadateie

Dä Artikel basiert uff ere fräie Übersetzig vum Artikel „Kontinent“ vu de dütsche Wikipedia. E Liste vu de Autore un Versione isch do z finde.