Legion

A römische Legion (kummt usm lateinischa "legio": "leasa", "sammla", "usleasa") isch a Einheit im römischa Militär gsi. In deam sin zwüscha 4000 und 6000 Mää gsi. Dazua sind eppa gliichviil Mää Hilfstruppa gsi. Da Grund vum bsundriga militärischa Erfolg vu da Legion isch überleagane Usrüschtung, Usbildung und Disziplin gsi. Durch des hot s römische Riich sich so usbreita künna.

Legionär um 70 n. Chr

Gschicht

Mit da Zit hot sich d Legion varändert. Während da früha römischa Republik hots koa schtehendes Heer gea, bei jedam Krieg hond alle Römer kämpfa müassa. Im Ganza hot d römische Armee zu dea Zit 25 Legiona ghet. Weil ma sine Usrüschtung seall kofa hot müassa, sind d riche Römer zua da Reiterei ko und d Arma hot ma als lichte Infantrii verwendet. Des hot denn da Gaius Marius (156 v. Chr.-86 v. Chr.) gändrat. Er hot erreicht, dass da Schtaat d Usrüschtung gschtellt hot, so dass o arme Lüt in bessare Positiona ku künna. Usserdem isch s bisherige Milizheer in a Beruafsheer umgwandlet wora. D Soldata hond an Sold kriagt und noch 16 Johr a Schtückle Land.

Weil aber durch d Reform d Loyalität vu da Soldata zum Heerführer immer wichtiga als d Loyalität zum Schtaat worra isch, sind denn Bürgerkriege möglich worra. Drum isch d Reforma vom Marius an großa Grund für da Untergang vu da römischa Republik.

Taktik

D Legion isch in Blöck ufgschtellt gsi. Beim Anschturm vom Gegner sind zerscht Schpeer (pila) gworfa worra, denn hond leichte Soldata (hastati) da Anschturm mit Kurzschwerta (gladii) abgfanga. Dia hond sich denn zruckzoga, während d schwere Infantrii (principes) da Kampf witergfüart hot.