Madame Sans Gêne

Madame Sans Gêne ischt a franzeesisch-italienisch-schbanischer Schbiilfilm us-em Jôhr 1961 vom franzeesischa Regisseur Christian-Jaque, wo d Lebensgschicht vo dr elsässischa Wäschere ond schbätra Herzogin vo Danzig, Catherine Hübscher, zom Inhalt hôt, es mit dr Wôhret abr et so ganz gnau nemmt. S Drehbuach stammt vom Regisseur ond viir weitre Autora (lueg dô drzua d Infobox) ond beruaht uff-em gleichnamiga Theaterstick vom Victorien Sardou ond em Émile Moreau, wo 1893 z Paris zom erschda Môl uff d Bihne komma ischt. Z Deitschland hôt der Film zom erschda Môl am 23. Merz 1962 da Weag ens Kino gfonda.

Filmdate
Dütsche Titel	Madame Sans Gêne
Originaltitel	Madame Sans-Gêne
Produktionsland	Frankreich, Italia, Schbania
Originalsprooch	Franzeesisch
Erschiinigsjoor	1961
Lengi	98 Minute
Altersfreigoob	FSK 12
Stab
Regie	Christian-Jaque
Dräibuech	Christian Jaque, Henry Jeanson, Ennio De Concini, Jean Ferry ond Franco Solinas
Produktion	Maleno Malenotti, Carlo Ponti, Elie Schluper ond Serge Silberman
Muusig	Angelo Francesco Lavagnino
Kamera	Roberto Gerardi
Schnitt	Jacques Desagneaux ond Eraido Da Roma
Bsetzig
D Sophia Loren als Catherine Hübscher, bei de meischde Leit bekannt als d „Madame Sans-Gêne“, uff schwäbisch d „Frau ohne Vrleagaheit“ Dr Robert Hossein als ihr Liibhaber ond schbätre Môô Francois-Joseph Lefèbvre Dr Julien Bertheau als Napoléon Bonaparte D Marina Berti als Elisa Bonaparte Dr Carlo Giuffrè als Jérôme Bonaparte Dr Fernando Sancho als Pommier D Gabriella Palotta als Héloise D Analía Gadé als Caroline Bonaparte D Laura Valenzuela als Pauline Bonaparte Dr Gianrico Tedeschi als Roquet Dr Renaud Mary als Fouché ond sonscht noh an Haufa Fraua, Manna ond Stadischda

Dialäkt: Schwäbisch

Handlong

En de Revoluzioos-Wirra vo 1792 vrschafft sich z Paris a Grubbe vo franzeesische Patriooda mit äller Gwalt a freia Ondrkunft em Haus vo dr Catherine Hübscher, ara jonga Wäschere us-em Elsass. Obwohl dr Ôfihrer vo sellem Heifle, dr Sergeant Lefèbvre, a Mords-Stoffl ischt, wo außer Romkrakeela scheints et viil glernt hôt, isch d Hübschere begeischtret vo deam Kerle.

Am Dag druff dreffet em keeniglicha Palascht, wo am friha Môrga erobret ond uff-em Dach d Fahna vo dr Revoluzioo ghisst wôrra ischt, d Hübschere ond dr Lefèbvre wiidr uffnandr. Weil älle grad weaga dera glongena Revoluzioo en Hochstemmong send, fallet sich dia zwoi en d Ärm ond stellet fescht, dass-se sich ganz arg meeget. Drom wellet-se au ihr weitres Leaba nemme ussnander ganga. Was dia zwoi abr et ahnet ischt, dass nomôl a Persoo exischdiirt, wo ihrn Lebensweag ganz entscheidend beeiflussa wuud: dr Napoléon Bonaparte. Weil dr Lefèbvre oiner vo seine treieschde Helfer ischt, steigt’r bald zom Hauptmôô auf. En dera Eigaschaft ischt’r abr kaum amôl drhoim bei seim Weib. Ama scheena Dag hôt-se a ganz bsonders Vrlanga nôch ihrem Francoise. Drom macht-se sich auf, ehn uff-em Schlachtfeld zo suacha. Wia-sen schliaßlich gfonda hôt, muaß-se feschtstella, dass dia moralische Sidda bei dr Armee zemlich vrwahrlost send. Ihr Môô abr kô-se beruhiga. En-ra abgleagena Schuier „vrsehnt“-se sich wiidr mit-em. Weil abr emmer noh Kriag ischt, werret-se en ihrem Vrsteck vo de Eschtreicher entdeckt ond zom Dod vrurteilt. Dia zwoi kennet aber fliha ond schaffet’s, dô drbei noh a Munitionslager en d Luft zo schbrenga.

Bald wuud dr Napoléon Kaiser vo de Franzosa. Zom Dank fir seine treie Denscht ernennt’r da Lefèbvre zom Herzog vo Danzig. Des hôt zor Folge, dass sei Frau automadisch au dean Titl fihra därf. Wia nô au noh ihr Môô Kenich vo Weschtfala werra soll, platzt de Schweschtra vom Napoleon dr Kraga. Se fanget ôô, gega dui Aufsteigere zo intrigiira ond schboddet ibr ihr Herkonft als Wäschere. Abr dô kommet-se bei dr Hübschere an de Falsch nô. De sell geit’s-en mit de gleiche Waffa zruck: Wo kommt denn dui Familie Bonaparte her? Send dia Familia-Ôgheerige villeicht ebbes Bessrs? – S geit an handfeschda Skandal! Dô druff geit dr Napoléon em Lefèbvre da denschtlicha Befehl, sich vo seim Weib scheida zo lassa. Dui abr denkt et drô, sich uff so ebbes eizolau. Perseenlich eilt-se zom Kaiser ond sait-em ihr Moinong, ond dees et grad mit-ra leisa Stemm! So nôch ond nôch wuud des Gschbräch zwischa deane zwoi freindlicher. Se schwätzet vo de alde Zeida, vo dr Hübschere ihrem Wäsche-Lada, vo de Schlachda vo dr Armee ond vo a baar Belanglosichkeida. So vrgôht d Zeit. Irgendwann daucht dr Madame ihr Môô auf, om uff da weschtfälischa Thron zo vrzichda, damit’r sich vo seira Catherine et trenna muaß. Ond so a edla Haldong lôôt au da Napoléon et kalt. Uff oimôl vrlangt’r koi Scheidong meh. Zom Donnerwedder nomôl: Dui Hübschere, wo vom Volk bloß d „Madame Sans Gêne“ ghoißa wuud, dees ischt a Weib!

Kridika

• S Lexikon des internationalen Films moint, es dät sich bei deam Stroifa om a Sophia-Loren-Komeede nôch-ma bihna- ond fernsehbewährda Amisiirstick vom Sardou handla, wo de oinzlne Szena mit-ma graußa Schaugepräge ausgschdadded send.

• Dr Evangelische Film-Beobachter schreibt, «Madame Sans Gêne» wär a ôôschbruchslosa Vrfilmong vo dr Gschicht ibr dui Weschere, wo zor Herzogin wôrra ischt, ohne dôdurch ihr Vrbondaheit zom Volk zo vrliira. Zor Ondrhaldong fir Leit ab 16 Jôhr wär der Stroifa meeglich!

Litradur ond Quell

S Programm zom Film (Illustrierte Film-Bühne, Vereinigte Verlagsgesellschaften Franke & Co. KG, München, Nr. 6060)

Weblink

• Madame sans Gêne in dr Internet Movie Database
• A baar Bilder zom Film bei cinema.de