Mahavira

De Vardhamana Mahavira (skt. वर्धमान महावीर, Vardhamāna Mahāvīra m.; 547-477 v. Chr.) isch de 24. Tirthamkara und de historisch Bigründer vom Jinismus. Er isch e Zittgnoss vom Buddha gsi.

s Lebe

De Vardhamana (amg. Vaddhamāṇa) isch de Soo vom König Siddhartha (amg. Siddhattha) und vo de Trishala (amg. Tisalā) gsii und het zu de Famili Jnatr (amg. Nāya) vom Land Videha ghört. Er het d Yashoda (amg. Jasoyā) ghüroote und ai Tochter gha, d Anavadya (amg. Aṇojjā). Die het de Jamali ghüüroote, en spöötere Widersacher von em. Nochem Tood vo sinene Eltere, wo Aahänger vom Parshva gsii sind, het er sini Famili verloo und isch Mönch wore. Dozmol isch er Driisgi gsii. Noch drizee Mönet het er ales uufgee, und au uf Chlaider verzichtet. Noch zwölf Joor strenge Askese het er „Allwüssehait“ erlangt. Ab denn het er as Mahavira („Groossheld“) oder Jina („Öberwinder“) sini Lehr verchündet. Debii isch er vom König Shrenika vo Magadha und spööter vo dem sim Soo Kunika understützt wore. De Mahavira isch mit 72 z Pava gstorbe.

Büecher

Hans Wilhelm Haussig (Hg.): Götter und Mythen des Indischen Subkontinents. Stuttgart: Klett-Cotta (1984). ISBN 3-12-909850-X
Walther Schubring: Der Jinismus; i Die Religionen Indiens, Bd.III. Stuggart: Kohlhammer 1964.