Monimos und Azizos

De Monimos und Azizos sind zwee Götter und Biglaiter vom Sunegott Helios z Edessa gsii, enere Stadt i de hüttige Törggai zwöschet Euphrat und Tigris.

De Chaiser Julian Apostata (360-363) hett öber de Sunekult vo Edessa gschribe und gsait, as de Monimos und de Azizos di ständige Biglaiter vom Helios saied und de Azizos i Prozessione em Helios vorusgöchi. Baid Götter bringed vill Sege uf d Erde. Nochem Jamblichus söll de Azizos de Ares und de Monimos de Hermes sii.

Di zwee Götter sind offesichtlich vo de Araber entleent, denn Monimos (Μόνιμος) gitt Arabische muˁnim „gnädig“ und Azizos (῎Αζιζος) ˁaziz „starch“ wider. Obwoll di antike Quelle di beede Götter mit em Hermes und Ares, aso de Planete Merkur und Mars, gliichsetzid, werd agnoo, as si de Morge- und de Oobestern verkörperet, und zwoor de Azizos de Morgestern, wo de chriegerisch Aspekt vo de Venus as Vorchämpfer vom Taag verkörperi, und de Monimos de Oobestern, de lieblich Aspekt vo de Venus.

De Azizos werd au i römische Inschrifte us Apulum i de Provinz Dakie gnennt, as deus Azizus bonus puer „Gott Azizus, guete Burscht“. I de Oase Palmyra isch er zäme mitem Arṣu vereert wore, den annt isch as e Kameelriiter und de ander as e Rossriiter dargstellt wore und si sind Bischützer vo de Karawane gsii. De Name Arṣu entsprecht em arabische Göttername Ruḍā „Gnäädige“, entsprecht aso sproochlich völlig em Monimos. Au di ugaritische Götter Šaḥr und Šalim wered as ilm nˁmm wysmm „gnädigi und lieblichi Götter“ bizachnet, wobii s erst Wort di semitisch Worzle nˁm enthaltet, wie de Name Monimos. Wege demm isches woorschiinli, as all die Götterpaar de Morge- und de Oobestern bizaichnet.