Morgens um sieben ist die Welt noch in Ordnung

Morgens um sieben ist die Welt noch in Ordnung ischt a deitscher Schbiilfilm us-em Jôhr 1968 vom Regisseur Kurt Hoffmann mit-em Archibald Eser, dr Gerlinde Locker ond em Werner Hinz en de Hauptrolla. S Drehbuach vom Autora-gschbann Eberhard Keindorff ond Johanna Sibelius beruaht uff-em gleichnamiga Roman vom Englender Eric Malpass (1910 bis 1996). Zom erschda Môl ens Kino komma isch der Stroifa en dr Bundesrepublik Deitschland am 5. Sebdembr 1968.

Filmdate
Dütsche Titel	Morgens um sieben ist die Welt noch in Ordnung
Originaltitel	Morgens um sieben ist die Welt noch in Ordnung
Produktionsland	Deutschland
Originalsprooch	Deitsch
Erschiinigsjoor	1968
Lengi	96 Minute
Altersfreigoob	FSK 6
Stab
Regie	Kurt Hoffmann
Dräibuech	Eberhard Keindorff Johanna Sibelius
Produktion	Heinz Angermeyer
Muusig	James Last
Kamera	Heinz Hölscher
Schnitt	Gisela Haller
Bsetzig
Dr Archibald Eser als Gaylord Pentecost D Gerlinde Locker als May Pentecost Dr Peter Arens als Jocelyn Pentecost Dr Werner Hinz als Großvaddr D Agnes Windeck als Großdande Marigold D Maria Körber als Dande Rose D Diana Körner als Dande Becky Dr Herbert Bötticher als Stan Grebbie Dr Gerd Vespermann als “Bobs” Roberts Dr Rolf Zacher als Peter D Eva Lissa als Frau Foggerty Dr Gerd Lohmeyer als Willy Dr Wolfgang Petry als Bert D Lu Säuberlich als Dande Bea Dr Charles Hans Vogt als Onkel Ben D Dinah Hinz als Frailein Marston Dr Dirk Reichert als David

Dialäkt: Schwäbisch

Om was gôht’s en deam Film?

Der Film schbiilt en-ra lendlicha Gegend en England. Zo dr nägscht-graißra Stadt ischt’s abr et weit. D Hauptpersoo isch dr siibajährige Bua Gaylord. Der vrstôht’s ausgezeichnet, sei Familie dauernd uff Trab zo halda. Ond dees will ebbes hoißa, wenn-mr bericksichdigt, wer en sellem scheena Landhaus so ällas wohnt: em Gaylord seine Eltra, a Großvadder, zwoi Danda, a Großdande ond sonscht noh a baar jengere Vrwandte. Dô drzua kommet manchmôl au no a baar Gäscht. Abr älle Stroich vom Gaylord send et bees gmoint. Doch wia mr’s nemmt: Hin ond wiidr bricht au ebbes Wesentlichere vo außa en dui heila Welt vo deam Bua ei und zwengt zom Nôchdenka … Ond des send et bloß selle Liabeswirra vo de jonge Leit vo dera graußa Familie, sondern au soddiche Erleabnis, wo da Gaylord hechschtperseenlich berihret, wia zom Beischbiil dui hässlicha Gschicht mit sellem geischdes-schwacha Dorfbuaba Willy, wo da Gaylord beschuldigt, er häb ehm sei wertvolla Glaskugel aus dr Holzhidde beim Stoibruch gschdohla. Seller Omstand tregt em Gaylord uff-em Schualweag a Tracht Priigel ond a leabens-gfährlicha Halsvrletzong vom Willy seine Briader ei. Zom Schluss wendet sich abr Älles zom Guada, au beim andra Jongvolk. Bloß dui ganz liaba, alda, arg schwerheeriga Großdande Marigold segnet s Zeitliche.

Kridika

• Dr Evangelische Film-Beobachter moint, Morgens um sieben ist die Welt noch in Ordnung wär a guads deitsch Luschtschbiil nôch-em Eric Malpass seim beliabda ond weit vrbroidada Buach. Dr Regisseur Kurt Hoffmann hedd’s vrschdanda, a ôôgnehm temboriirda Ondrhaldong zo brenga.
• Koi ganz so guada Moinong wia dr EFB hôt s Lexikon des internationalen Films. Des schreibt, der Film wär a bissle klischeehaft ond mit-ma groba Regie-Stift zoichnet, wo d Persona ond d Situazioona zo-ma Bild vo-ma heiter-komischa Familia-Leaba schildret, wo jeder sich selber dren erkenna ond ohne Gram driiber lacha kôô.

Auszoichnong

Weil dean Film em Kino meh wia drei Milliona Zuaschauer ôôguckt hend, ischt’r em Jôhr 1969 mit dr Goldena Leiwand auszoichnet wôrra.

Weblink

• Morgens um sieben ist die Welt noch in Ordnung in dr Internet Movie Database
• Ausfihronga zo deam Film bei filmportal.de
• A baar Nodiza zo dr Produkzioo vo deam Film mit a baar kurze Kridika bei zelluloid.de