Mundartlyrik-Wettbewerb 1974
Im Friejohr 1974 het dr Siddytsch Rundfunk zue me Mundartlyrik-Wettbewärb ufgruefe. Uusgschribe wore isch dr Dialäkt-Wettbewärb vu dr Redaktion Land und Leute vum SDR. Dr Martin Blümcke, dr Laiter vu dr Redaktion, un sy Mitarbaiteri Heidi-Barbara Kloos hän mit däm Wettbewärb uf d „Dialektwelle“ reagiert, wu si syt e baar Johr abzaichnet het.
Mer het solle drei Gedicht yyschicke, dr 31. Juli 1974 isch Yysändeschluss gsii. Mitgmacht hän iber 600 Lyt us ganz Bade-Wirttebärg, zämechuu sin do rund 2000 Gedicht. Wel eso vyl Gedicht yygschickt wore sin, het s e weng bruucht, bis d Brysrichter entschide ghaa hän, erscht churz vor dr Wynächte 1974 sin d Gwinner in ere Radiosändig vorgstellt wore, derzu au e baar Gedicht vu andere, wu kai Brys gwunne hän.
Uuszaichnet wore sin drei Dichter:
- 1. Brys: Wilhelm Staudacher fir sy Gedicht «gester – heit – morche»
- 2. Brys: Manfred Bosch fir sy Gedicht «eweng im fotoalbum schbaziereluege»
- 3. Brys: Dieter Wieland
Di maischte Gedicht, wu yygsändet wore sin, sin vu dr Theme här typisch gsii fir di tradizionäll Dialäktdichtig: Glägehaitsgedicht, Anekdote, Idylle, Naturgedicht un Lobgedicht uf d Haimet un dr Dialäkt. Aber bi däm Wettbewärb sin au jungi Dichter*ne in d Effetligkait drätte, wu modärni Theme un modärni Gedicht-Forme bruucht hän. Där Wettbewärb vum Siddytsche Rundfunk isch fir d Dialäktliteratur z Bade-Wirttebärg e Inizialzindig gsii, wu derzu bydrait het, ass e Hufe jungi Autorne un Autore im Dialäkt aafange hän schrybe.
D Siiger-Gedicht un verschideni anderi uusgläseni Gedicht sin im Johr druf in dr Schwäbische Heimat abdruckt wore.