Paschalis I.

Dr Paschalis I. (* an dr Oschtere z Rom; † 11. Februar 824 ebe dert) isch vu 817 bis 824 Papscht as Noofolger vum Stephan IV. gsii.

dr Paschalis I. uf eme Mosaik vu dr Basilika Santa Prassede, 9. Johrhundert

Lääbe un Wirke

Dr Paschalis isch Abt vu St. Stephan z Rom gsii, wun er am 25. Jänner 817 zum Papscht gwehlt wore. Är het vum Chaiser Ludwig em Fromme di scho mit sym Vorgänger uusghandlet Garanty vu dr Sälbschtändigkait vum Chilchestaat un dr freie Papschtwahl iberchuu.

Dr Paschalis het si Miei gee um e Kooperation mit em weschtlige Chaiserdum un het 823 dr Lothar I. zum Chaiser gsalbt. Dr Lothar het aber bal wider versuecht, s Papschtdum un dr Chilchestaat änger an s Chaiserdum z binde. Dr Paschalis het dergege versuecht, Yyfluss in dr fränkische Rychschilche z nee un sy Stellig z Rom z feschtige. Är isch au ain vu dr wichtigschte Ferderer vu dr Missionierig vu Nordeuropa. Kulturäll isch er au aktiv un het z Rom Chilche grindet un reschtauriere loo, wu zum Dail mit Mosaik in spotantiker Dradition uusgschmickt wore sin.

Z Rom isch er wäg syre stränge Amtsfierig uubeliebt gsii, 824 isch s zue Uurueje chuu. No sym Dod isch er in dr vu ihm widerufgrichtete Chilche Santa Prassede vergrabe wore, wel s Volk e Grablegig in Alt-St. Peter verhinderet het. Sy Noofolger Eugenius II. het d Bai aber doch in e Kapäll vu dr vatikanische Basilika iberfiere loo. Villicht het er d Zenon-Kapäll in dr Basilika Santa Prassede as Grabstätt fir sy Teodora Episcopa böue loo.

S Patronatsfescht vum hailiggsprochene Paschalis isch am 14. Mai. Kadolische Mahndag isch dr 11. Februar.

Literatur

• Caroline J. Goodson: The Rome of Pope Paschal I. Cambridge University Press, Cambridge 2010.

Weblink

 Commons: Paschalis I. – Sammlig vo Multimediadateie

• Ytrag in d Catholic Encyclopedia, Robert Appleton Company, New York 1913 (änglisch)
• Gsamtwärch vu Migne Patrologia Latina mit Inhaltsverzaichnis

Vorgänger	Amt	Nachfolger
Stephan IV.	Papscht 817–824	Eugen II.

Dä Artikel basiert uff ere fräie Übersetzig vu dere Version vum Artikel „Paschalis_I._(Papst)“ vu de dütsche Wikipedia. E Liste vu de Autore un Versione isch do z finde.