Dä Artikel beschäftigt sich mit de mythische Gstalt Quaoar, anderi Bedütige vu dem Begriff findener under Quaoar


Dialäkt: Markgräflerisch (Ebringe)

Quaoar isch de Namme vu de Schöpfergotthait vum Volch vu de Tongva, wo vor de Achumft vu de Europäer in de Gegend vum hütige Los Angeles in de USA gsidlet hän.

Wie in de maischte Schöpfigsmythe isch au bi de Tongva am Afang s'Chaos gsi. Quaoar isch danzend ussem Chaos entsprunge un het no d'Welt in d'Existenz danzt, während er s'Lied vu de Schöpfig gsunge het. Z'erst isch äso de Himmelsgott Weywot entstande, deno d'Erdgötti Chehooit, wo deno zämme mitem Quaoar d'Sunne (Tamit) un de Mond (Moar) in d'Welt danzt hän.

Zämme hän die fimf no alles ander ins Dosi danzt: Dier, Pflanze, Mensche un au die andere Götter. Noochdem er si Werch beendet gha het, isch Quaoar aifach irgendwoani verschwunde.

Anno 2002, isch ä großes transneptunischs Objekt uf de Namme Quaoar daift worre.