Quartet du dialogue national

S Quartet du dialogue national (arabisch رباعية الحوار الوطنى التونسى ‎, DMG rubāʿiyyat al-ḥiwār al-waṭanī at-tūnisī, alemannisch Quartett fir nationale Dialog) isch e Plattform, wu fir d Ferderig vu dr Demokratisierig vu Tunesie no dr Revolution 2010/2011 ufböue woren isch. Anne 2015 isch s mit em Friidesnobelbryys uuszaichnet wore.

Verträtter vu de vier Organisatione 2016 bi de OSZE z Wien

S Quartet du dialogue national setzt si us däne vier Organisatione zämme:

• dr Gwerkschaftsdachverband Union Générale Tunisienne du Travail (UGTT; arabisch الاتحاد العام التونسي للشغل‎, DMG al-ittiḥād al-ʿāmm at-tūnisī li-š-šuġl)
• dr Handels- un Induschtryverband Union Tunisienne de l’Industrie, du Commerce et de l’Artisanat (UTICA; arabisch الاتحاد التونسي للصناعة والتجارة والصناعات التقليدية‎)
• d Mänscherächtsorganisation Tunesischi Liga fir d Verdaidigung vu dr Mänscherächt arabisch الرابطة التونسية للدفاع عن حقوق الإنسان‎, DMG ar-Rābiṭa at-tūnisiyya li-d-difāʿ ʿan ḥuqūq al-insān; franzesisch La Ligue Tunisienne pour la Défense des Droits de l’Homme, LTDH)
• d Verainigung vu dr Rächtsaawält Ordre National des Avocats de Tunisie (arabisch الهيئة الوطنية للمحامين بتونس‎)

Gschicht

S Arabisch Friejohr het z Tunesien aagfange. Bal no dr Revolution am 23. Oktober 2011 isch di verfassigsgebend Nationalversammlig gwehlt wore, wu di gmäßigt islamistisch Bartei Ennahda as Wahlsiiger drus fiirigangen isch. D Ennahda het no dr Wahl zämme mit dr säkuläre Mitti-links-Barteie CPR und Ettakatol d Regierig bildet. D Ufstellig vun ere neie Verfassig het si aber länger hiizoge. In däre Zyt isch s zue all greßere Spannige chuu, wu im Augschte 2013 mit zwee Aaschleeg ihre Hegschtpunkt ghaa hän. Dr Demokratisierigsprozäss isch ärnschthaft gfehrdet gsii.

In däm Umfäld het d UGTT mit eme erschte Versuech vun eme nationalen Dialog aagfange. S isch aber nyt drus wopre, wel d Ennahdha dä Dialog boykottiert ghaa het. Im Septämber 2013 het e zweete Versuech aagfange, desmol mit vier Organisatione.

Fueßnote

Dä Artikel basiert uff ere fräie Übersetzig vum Artikel „Quartet_du_dialogue_national“ vu de dütsche Wikipedia. E Liste vu de Autore un Versione isch do z finde.