Renée de France
D Renée de France (* 25. Oktober 1510 z Blois; † 12. Juni 1574 z Montargis), au bekannt as Renata vo Ferrara, isch e kööniglichi Brinzässin vo Frankriich gsi. Si isch mit em Ercole II. d’Este vom 31. Oktober 1534 bis 3. Oktober 1559 verhürootet gsi und eso d Herzogin vo Ferrara und vo Modena und Reggio nell’Emilia. Si het d Reformazioon in dr Lombardei und Frankriich gförderet.
Biografii
ändereD Renée isch as die zwäiti Dochder vom franzöösische Köönig Louis XII. und sinere Frau Anne de Bretagne im Schloss Blois uf d Wält cho.[1] D Renée hätt äigentli dBretagne sötte erbe, was dr Louis aber verhinderet het. As Entschäädigung het si denn vom Franz, wo vom Louis d Bretagne überchoo het, s Herzogdum Chartres überchoo. Mit fümfi isch si e Vollwaise gsi und wil si chli, schwechlig mit ere chrumme Wirbelsüüle gsi isch, het si nid as e gueti Partii gulte.[2] D Gründ für iiri Hüroot 1528 mit em Ercole d'Este si denn au vor allem bolitisch gsi.
D Renée het zwüsche 1531 und 1538 fümf Chinder uf d Wält brocht. Wääred de Religioonschrieg im 16. Joorhundert het d Renée meehrere Calviniste s Lääbe grettet, und dr herzöglig Hoof vo Ferrara isch zum en Asüül für protestantische Gleerti worde.[1] Under iine si dr Clément Marot (1535; wo für e Zitli iire Brivaatsekretäär gsi isch), dr Johannes Calvin (zum erste Mol 1536 under em Decknaame Charles d'Espeville), d Vittoria Colonna (1537), dr Bernardino Ochino (1537 und 1550), dr Celio Secondo Curione, dr Camillo Renato (1540) und dr Aonio Paleario. Dr Form noch isch si woorschinlig katholisch bliibe, aber iiri Sümpathie für e Protestantismus häi zum Bruch mit iirem Maa gfüert. 1554 het mä sä under Huusarrest gstellt, iiri calvinistische Büecher verbrennt und iiri Döchder in e Chloster gsteckt. Dass si druf wider an dr katholische Öicharistii däilgnoo het, het im Calvin hingeege überhaupt nid gfalle.[2][3]
Wo iire Maa gstorbe isch, isch si 1560 uf Frankriich zrugg. Dört isch iiri eltiste Dochder Anna mit em François de Guise, wo dr Aaf[erer vo dr katholische Bardei im erste Hugenottechrieg gsi isch, verhürootet gsi.
Fuessnoote
ändere- ↑ 1,0 1,1 Renata von Ferrara, französischer Name: Reneé de France im Ökumeenische Häiligelexikon.
- ↑ 2,0 2,1 Martina Mangels: Renée de France. „Menschlichkeit zwischen den Fronten“: die Königstochter, die den Bäcker retten wollte. In: 500 Jahre Reformation – von Frauen gestaltet (Website Frauen und Reformation).
- ↑ Sonja Domröse: Frauen der Reformationszeit, Gelehrt, mutig und glaubensfest, Vandenhoeck & Ruprecht, Göttingen 2010 und 2014, ISBN 978-3-525-55012-0, S. 115–132