Representativi Demokratii
In dr Representative Demokratii isch s nit s Volk sälber, wo die politische Sachentscheidige drifft, wie s in dr diräkte Demokratii dr Fall isch, sondern gweelti Volksverdrätter mache das, ohni dass s Volk diräkt cha iigriffe.
Repräsentation
ändereWil s „Volk“ us vile, in ere Demokratii gliichberächdigte, Persone bestoht, wo jede siini eigene Aasichte het, si sich nie alli einig über e Sach. In ere Demokratii müesse so Kompromiss gfunde wärde, wo die grösstmögligi Zahl vo de Bürger cha akzeptiere, au wenn s nit immer das isch, wo si vorzooge hätte, und wo d Grundrächt vo dr Minderheit nit verletzt. D Zahl vo de öffentlige Gschäft in ere modärne Gsellschaft isch grooss, so dass in dr Praxis s Staatsvolk nit sälber über alles entscheide cha. Dorum si in alle Demokratie hützudags d Kompetänze, meistens uf verschiidnige Organisationsebene, ufdeilt worde und gwehlte Volksverdrätter überge worde. Die Verdrätter wärde vom Wahlvolk gwehlt uf Grund vo was d Lüt dängge, wie guet si ihri Inträsse wurde verdrätte, und si wüsse, ass ihri Entscheidgunge in Zuekumft ihri Wiiderwahl wurd beiiflusse. Nid immer isch das die einzigi Möglichkeit vom Volk z beiiflusse, was im Staat bassiert. Es git System, wo s Volk d Entscheid vo siine Representante cha annulliere, wie s zum Bispil in dr Schwiiz mit em Referendumsrächt dr Fall isch, oder si mit ere Volksinitiative drzue cha zwinge, sich ere Sach aaznäh. In andere System existiert numme s Petitionsrächt, wo d Regierig nit zwungen isch druf iizgoh und in wider andere isch dr Iifluss vom Volk uf d Wahl vo siine Verdrätter beschränggt.
In modärne Demokratie hai sich politischi Parteie bildet, wo d Mitgliider drvo sich mit ere bestimmte Ideologii identifiziere oder sust gmeinsami Inträsse hai. D Programm vo de Parteie wärde öffentlig bekannt gmacht und diene drzue, ass d Wehler die Lüüt chönne uuseläse, wo si von ene dängge, ass si se am beste wurde representiere.