Schwimmstil

De Schwimmstil isch d Art wie gschwume werd. Im Schwimmsport wered i de Regle vier Schwümm glernt, denebet gits no Schwümm wo bi üüs weniger hüüffig vorchömed. Di verschidnige Schwimmstiil wered unterteilt i Gliichschlaag und Wechselschlaag, je nochdem, wie d Ärm biweggt wered.

d Schwümm

De Brustschwumm isch de Schwumm wo bi üs zerschte glernt werd und au em hüüffigste gschwumme werd. D Arm und Bai wered gliichmeessig und symmetrisch biweggt. De Chopf sött im Wasser ligge, weniger gueti Schwimmer aber lönd de Chopf immer öberem Wasser.
De Chraul isch de Schwumm, womer em schnellste schwimme cha. De Aatriib werd vor alem mit de Ärm und Händ gmacht, wo im Wechselschlaag biwegt wered. D Ootetechnik bim Chraule mue guet igüebt were und isch nöd aifach.
De Hundeschwumm isch en aifacheri Art vom Chraule. Debii werd de Chopf immer öberem Wasser ghalte und de Körper litt nöd ase flach im Wasser. D Bai und d Ärm biweget sich nöd symmetrisch. I üsne Braitegraad isch de Schwumm nöd biliebt, i anderne Kultuure isch de Schwumm aber gang und geeb.
De Delphiinschwumm isch de Schwumm, wo em schwerste isch. Wel er uf Englisch butterfly ("Summervogel") haisst, werd er mengisch au as Schmetterlingschwumm bizaichnet. Bim Delphiinschwumm werd de ganz Liib rhytmisch und weleförmig biweggt, äänlich wie bimene Delphiin. Noch e paar Züüg, wered denn no d Händ im Gliichschlaag iigsetzt.
Bim Kolchische Schwumm wered d Ärm fest an Körper anepresst und d Bai zemepresst, d Biwegig vom Liib isch wie bim Delphiinschwumm. De Schwümmer haltet sich aso ooni Hilf vo de Ärm und Bai öberem Wasser.
Bim Ruggeschwumm werd ufem Rugge gschwumme und d Arm im Wechselschlaag biwegt. Mengisch sait mer dem Schwumm au Ruggechraule.
De Alttütschi Ruggeschwumm werd hütt numeno selte gschwumme. Im Gegesatz zom gängige Ruggeschwumm wered d Arm bi dem Schwumm im Gliichschlaag iigsetzt.
Bim Siiteschwumm werd uf de Sitte gschwumme. De Schwumm isch hütt nüme bsundrigs verbraitet. Er isch en Art Mischig zwöschet em Chraule und dem Brustschwumm.

Sportschwimme und Wettchampf

Im Sport und im Wettchampf wered hütt de Brustschwumm, de Chraul, de Delphiinschwumm und de Ruggeschwumm träniert und biwertet.

Weblink

Bildraie und Animazione zu de Schwimmstil uf sportunterricht.de
Tips zu de Schwimmthematik uf svl.ch, de Website vom Schwimmverein Limmat
Zu de Gschicht vom Schwimme uf svl.ch