Taylor Swift

D Taylor Alison Swift (* 13. Dezämber 1989 z Reading, Pennsylvania) isch e US-amerikanischi Pop- un Country-Sängeri, Gitarrischti, Songwriteri, Musikproduzänti un Schauspiileri. Si het iber 200 Millione Dondreger verchauft un ghert dodermit zue dr wältwyt erfolgrychschte Chinschtlerne.

Lääbe

Si isch anne 1989 z Reading, Pennsylvania in e Familie vu dr obere Mittelschicht vu Wyomissing uf d Wält chuu.^[1] Iri Mueter Andrea Gardner Finlay isch laitendi Aagstellti im Marketing un speter Huusfrau gsii, ire Vater Scott Kingsley Swift isch Vermegesberoter bi Merrill Lynch.^[2] Ire jinger Brueder isch dr Schauspiiler Austin Swift.

Iri Großmueter vu dr Muetersyte, d Marjorie Finlay, isch Operesängeri gsii un het d Swift in ire frieje musikalische Karriere inschpiriert.^[3]^[4] Uf irem nynte Studioalbum – evermore – het d Swift ere s Lied marjorie gwidmet. Uf em vorige Album folklore het si in epiphany unter anderem iber d Chriegstraumata vu irem Großvater Dean gsunge, wu im Zweete Wältchrieg im Kampf gege Japan yygsetzt gsii isch.

D Swift isch uf d Chinderschuel un d Vorschuel vi dr Alvernia Montessori School gange, derno uf d The Wyndcroft School z Pottstown. Wu iri Familie in e Vorstadt vu Wyomissing zogen isch, isch si dert uf d High School gange. Speter isch ir Familie uf Hendersonville z Tennessee zoge, go necher bi Nashville, em Zäntrum vu dr Country-Musik, z syy. Dert isch si uf High School gange, un isch mit 15 Johr in Färnunterricht gwägslet.

Ase chlai het d Swift vor allem Country-Musik vu Chinschtlerne wie LeAnn Rimes, Patsy Cline, Dolly Parton, Dixie Chicks un Shania Twain ghert. Im Alter vu nyn Johr het si mit Musik- un Gsangsunterricht z New York City aagfange. Mit zeh Johr isch d Swift bi Karaokewettbewärb un as Sängeri bi Feschtiwäl un Mässe ufdrätte. Mit zwelf het si aafange Gitarre leere.^[5]

D Swift het im Alter vu 14 Joor mit em Schrybe vu Täxt aagfange. Im nämlige Alter isch si uf Nashville go Country-Musikeri wäre. 2004 het si ne Songwriting-Verdrag bi Sony/ATV Music Publishing un 2005 e Blatteverdrag bi Big Machine Records unterziachnet. Ire Debütalbum Taylor Swift het si 2006 zur erschte Country-Sängeri gmacht, wu an eme US-Album mitgschribe het, wu mit Platin uuszaichnet woren isch.

Iri negschte Albe, Fearless (2008) un Speak Now (2010), sin ender Country-Pop, uf em Album Speak Now het s au au scho Rockelemänt. D Stugg Love Story un You Belong with Me uf Fearless sin di erschte Country-Lieder gsii, wu d Country- un au d Pop-Airplay- bzw. d Hot-100-Airplay-Chart aagfiert hän, mit däne Lieder isch d Swift schnäll beriemt wore. Uf em Album Red vu 2012 het si mit elektronische Stil experimäntiert, do het s au ire erschte Nummere-ais-Song vu dr Billboard Hot 100 druf, We Are Never Ever Getting Back Together.

Mit irem fimfte Studioalbum 1989 vu 2014 het si s Country-Genre ganz verloo, d Synthiepop-Song Shake It Off, Blank Space un Bad Blood sin großi Erfolg wore. Ire Album Reputation (2017) isch vum Hip-Hop bregt gsii, dodrus isch d Nummere-ais-Single Look What You Made Me Do firigange.

Anne 2018 het d Swift dr Musikverlag Big Machine verloo un het bi Republic Records unterschribe. 2019 het si ire sibt Studioalbum Lover vereffetligt, im Johr druf di autobiografisch Dokumäntazion Miss Americana. Im dr Zyt vu dr COVID-19-Pandemy het d Swift d Indie-Folk- un Alternative-Rock-Albe Folklore un Evermore vereffetligt, d -Single Cardigan un Willow dodrus hän d Hot 100 Singles Sales aagfiert.

Noch eme Stryt mit Big Machine Records het si iri erschte segs Albe, wu dert uusechuu sin, nei ufgnuu, di erschte vier mit em Zuesatz Taylor’s Versions. Di iberschafft Version vu All Too Well isch mit ere Duur vu 10:13 Minuten zum lengschte Nummere-1-Hit vu dr Hot-100-Chartgschicht wore. Ire zeht Studioalbum Midnights isch 2022 uusechuu, het verschideni Streaming-Rekord broche un isch s fimft Album vun ere gsii, wu in dr USA iber ai Million Mol verchauft woren isch, was vorhär no kai Musikeri gschafft ghaa het. Dodruf isch ire nynt Nummere-ais-Hit Anti-Hero.

Bi dr Musikfilm Folklore: The Long Pond Studio Sessions un All Too Well: The Short Film het d Swift Reschy gfuiert un in andere Film Näberolle gspiilt.

Studioalbe

2006: Taylor Swift, Big Machine Records (UMG)
2008: Fearless, Big Machine Records (UMG)
- Fearless (Taylor’s Version), Republic Records (UMG)
2010: Speak Now, Big Machine Records (UMG)
- Speak Now (Taylor’s Version), Republic Records (UMG)
2012: Red, Big Machine Records (UMG)
- Red (Taylor’s Version), Republic Records (UMG)
2014: 1989, Big Machine Records (UMG)
- 1989 (Taylor’s Version), Republic Records (UMG)
2017: Reputation, Big Machine Records (UMG)
2019: Lover, Republic Records (UMG)
2020: Folklore, Republic Records (UMG)
2020: Evermore, Republic Records (UMG)
2022: Midnights, Republic Records (UMG)
2024: The Tortured Poets Department, Republic Records (UMG)

Filmografy

2009: Jonas Brothers – The 3D Concert
2009: CSI: Crime Scene Investigation (CSI: Vegas, Färnsehserie, Episod 9x16)
2009: Hannah Montana: The Movie (Hannah Montana – Der Film)
2010: Valentine’s Day (Valentinstag)
2012: The Lorax (Der Lorax, Sprächroll)
2013: New Girl (Färnsehserie, Episod 2x25 Elaine’s Big Day)
2014: The Giver (Hüter der Erinnerung)
2015: The 1989 World Tour Live
2018: Taylor Swift: Reputation Stadium Tour
2019: Cats
2020: Miss Americana
2020: City of Lover
2020: Folklore: The Long Pond Studio Sessions (au Reschy, Produkzion, Draibuech un Musik)
2021: All Too Well: The Short Film (Draibuech, Reschy un Musik)
2022: Amsterdam
2023: Taylor Swift: The Eras Tour

Dokumentarfilm

The True Story of Taylor Swift. 42 Min. Draibuech un Reschy: Hannah Summer. Verainigts Chenigrych 2023

Literatur

Chloe Govan: Taylor Swift: Her Story. Omnibus Press, London 2012, ISBN 978-1-78038-354-5.
Louisa Jepson: Taylor Swift. Simon & Schuster, New York 2013, ISBN 978-1-4711-3087-8.
Chas Newkey-Burden: Taylor Swift: The Whole Story. HarperCollins UK, London 2014, ISBN 978-0-00-754421-9.
Liv Spencer. Taylor Swift: The Platinum Edition. 2. Auflage. ECW Press, Toronto 2013, ISBN 978-1-77090-405-7.

Weblink

Commons: Taylor Swift – Sammlig vo Multimediadateie

Offiziälli Websyte vu dr Taylor Swift
Taylor Swift bi Discogs (änglisch)
Taylor Swift bi laut.de
Taylor Swift in dr Internet Movie Database
Taylor Swift bi Allmusic (änglisch)
d Taylor Swift bi Universal Music Dytschland

Fueßnote

↑ Kimberley Cutter: Taylor Swift’s Rise to America’s Sweetheart. In: Marie Claire. 2. Juni 2010, abgruefen am 7. Februar 2014.
↑ Erica Cohen: Taylor Swift’s father is a Blue Hen. In: UDaily. 23. September 2009, abgruefen am 7. Februar 2014.
↑ Taylor Swift: Biography. In: TV Guide. Abgruefen am 16. Oktober 2011.
↑ Taylor Swift song ‘Marjorie’ is a tribute to her late grandmother. 11. Dezember 2020, abgruefen am 31. März 2022 (änglisch).
↑ Exclusive: The real story behind Taylor Swift’s guitar ‘legend’: Meet the computer repairman who taught the pop superstar how to play. Abgruefen am 21. Oktober 2022.

Dä Artikel basiert uff ere fräie Übersetzig vu dere Version vum Artikel „Taylor_Swift“ vu de dütsche Wikipedia. E Liste vu de Autore un Versione isch do z finde.

[1] Kimberley Cutter: Taylor Swift’s Rise to America’s Sweetheart. In: Marie Claire. 2. Juni 2010, abgruefen am 7. Februar 2014.

[2] Erica Cohen: Taylor Swift’s father is a Blue Hen. In: UDaily. 23. September 2009, abgruefen am 7. Februar 2014.

[TVGuide.com_Biographie-3] Taylor Swift: Biography. In: TV Guide. Abgruefen am 16. Oktober 2011.

[4] Taylor Swift song ‘Marjorie’ is a tribute to her late grandmother. 11. Dezember 2020, abgruefen am 31. März 2022 (änglisch).

[5] Exclusive: The real story behind Taylor Swift’s guitar ‘legend’: Meet the computer repairman who taught the pop superstar how to play. Abgruefen am 21. Oktober 2022.

[1]

[2]

[3]

[4]

[5]