Hauptmenü ufmache
E Dennis-Matsch
E Dennis-Matsch im Doppel

Dennis isch e Ballspiil, wo vo zwäi oder vier Spiiler gspiilt wird. Wenn äi Spiiler gegen en andere spiilt, säit mä dam Äintel, wenn je zwäi Spiiler gegenenander spiile, isch das e Dobbel, wenn zwäi Manne im Team si isch s e Herredobbel, zwäi Fraue e Damedobbel oder e Maa und e Frau e gmischts Dobbel (Mixed). Früener het Dennis as en elitääre Sport gulte, hüte isch s e Bräitisport. Sit 1988 isch Dennis wider e Disziplin an de olümpische Summerspiil.

S SpiilBearbeite

Jeede Spiiler het e Dennisschleeger, won er d Dennisballe mit em schloot. S Ziil vom Spiil isch s, d Balle äimol mee as dr Gegner noch de Reegle über e Netz z spiile, wo in dr Middi vom Spiilfäld vo dr äinte Site bis zur andere ufgspannt isch. Noch de Reegle bedütet,

  • ass dr Spiiler d Balle mit em Schleeger über s Netz oder uf dr Site am Netz vrbi spiilt
  • ass d Balle maximal äimol dr Bode berüert, bevor men en zrugschloot ooni dass er denn no äinisch uf dr Site vom Spiiler am Boode aachunnt
  • ass d Balle maximal äimol dr Bode in dr Spiilhelfti vom Gegner berüert, usser wenn dä si diräkt zrugschloot (Volley)
  • ass mä d Balle nume mit em Schleeger berüert mit Usnaam vom Aaspiil
  • ass mä weder mit em Körper no mit em Schleeger am Netz aachunnt
  • ass mä d Balle nume en äinzigs Mol mit em Schleeger schloot

Am Aafang vom ene Ballwäggsel chunnt dr Ufschlag. D Balle muess drbii kwer über s Spiilfäld in s chliinere Fäld vo dr Spiilhelfti vom Gegner gspiilt wärde ooni dass si am Netz aachunnt. Mä daf zwäimol brobiere und wenns au bim zwäite Mol nid grootet, bechunnt dr Gegner e Punkt und mä reedet vom ene Dobbelfääler. Bim Ufschloo muess mä usserhalb vom Spiilfäld stoo, bis dass dr Schleeger d Balle berüert, sust zellt dr Ufschlag nid (Fuessfääler).

E Dennismatsch bestoot us Setz, und dä isch dr Gwünner, wo as erste zwäi Setz gwunne het, usser bi groosse Durnier, wo s drei Setz si. E Satz bestoot us Spiil und e Spiiler gwünnt e Satz, wenn er 6 Spiil gwünnt und dr Gegner mindestens zwäi Spiil weniger. Wenn bäidi Spiiler 6 Spiil gwunne häi, wird mäistens e Tie-Break gspiilt, wo entschäidet, wär dr Satz gwünnt.

Mä spiilt um Pünkt, und dr ersti Punkt vom ene Spiiler im ene Spiil häisst 15, dr zwäiti 30 und dr dritti 40. Wenn e Spiiler dr vierti Punk gwünnt und dr Gegner het 30 oder weniger denn het dr Spiiler gwunne. Wenn s 40:40 isch, redet mä vom ene tie und wär denn non e Punkt macht het d advantage. Dä gwünnt, wo d advantage het und dr neggst Punkt au no gwünnt.

Im ene Spiil het immer dr gliich Spiiler dr Ufschlaag, im neggste Spiil dr ander. Dr ersti Ufschlaag wird vo dr rächte Site vom Spiilfäld gspiilt und mä wäggslet mit jedem Punkt d Site, vo wo mä ufschloot.

LitratuurBearbeite

  • Burghard von Reznicek: Tennis. Das Spiel der Völker. Johann Grüneberg, Marburg 1932.
  • Theo Stemmler: Vom Jeu de paume zum Tennis. Eine Kurzgeschichte des Tennisspiels. Frankfurt/Main, Insel Verlag 1988 (Insel-Bücherei 1076/2)

WeblinggBearbeite

FuessnooteBearbeite

  Dä Artikel basiert uff ere fräie Übersetzig vum Artikel „Tennis“ vu de dütsche Wikipedia. E Liste vu de Autore un Versione isch do z finde.