Alemannische Wikipedia

Text:Michel Buck/Bagenga/Der Ochsabua

< Text:Michel Buck | Bagenga

[83]
Der Ochsabua.

S Hairle[1] gôht im Esch[2] spaziara,
Thuat sei’ Predig ei’studiara,
S Dächsle zottlat hinta drei’,
Guckt in älle Löcher nei’.

S Hairle thuat a Weile gruaba[3],
Stellt da kleina Ochsabuaba,
Sait: „jetz sag mer, Nepamuk:
Wiavel hüatescht huier Stuck?“

„Herr, des ka’ i Ui it saga,
S hôt bei miar noit sovel gschlaga,
Daß i sovel zälla könnt,
Doch mit Nama sind se gnennt:

[84]S Schnaikle[4] und der Steanagucker[5],
S Vihsier[6] und der Huffaschucker[7],
D Lad[8], der Horning[9], Mez und Moi,
Kohle[10], Laube[11], Strome[12], s Oi[13],

S Schlattauhr[14] und der Hälmlapicker,
S Glößaug[15] und der Stangaficker[16],
S Bläßle[17], s Steanle, s Trampeltiar[18],
S Oinhoan[19] und der Wuacharstiar[20].“

S Hairle fangt dô ana’ lacha:
„Wäger[21] jô, so muaß ma’s macha,
Wenn ma’ halt it häuher na’
Aß uff feinfe zälla ka’.“

S Hairle mit em schwaza Steacka
Wandlet wieder gegam Fleacka,
Kaihrt a weng im Hiascha ei’,
Trinkt a Schöpple rauta Wei’.

--- <references>

  1. ↑ Herrle, Pfarrherr.
  2. ↑ Flur.
  3. ↑ Ausruhen.
  4. ↑ Wählerisch im Fressen.
  5. ↑ Sterngucker.
  6. ↑ Mit abwärts gewandten Hörnern.
  7. ↑ Beim Gehen mit der Hüfte schuckend.
  8. ↑ Breitmaul.
  9. ↑ Februar.
  10. ↑ Schwarz.
  11. ↑ Laubmonat April.
  12. ↑ Gestreift.
  13. ↑ Mit eiförmiger Drüsengeschwulst am Hals.
  14. ↑ Mit abstehendem Ohr.
  15. ↑ Glozzaug.
  16. ↑ An den Stangen sich reibend.
  17. ↑ Mit weißer Stirne.
  18. ↑ Plump.
  19. ↑ Einhorn.
  20. ↑ Zuchtstier.
  21. ↑ Wahrlich.
Vun "https://als.wikipedia.org/w/index.php?title=Text:Michel_Buck/Bagenga/Der_Ochsabua&oldid=964175"