Text:Otto Gittinger/So semmer Leut/D'Versichereng

D'Versichereng

B'häb neba'm Bachmatheis hot's brennt,
Fascht hätt's am au sein Haus anzend't,
Ond er ischt net versichrat g'sein!
Was tuat am do der Bauch so waih!
Drom lauft er, wia-n-er goht ond stoht,
En d'Stadt, daß er's versichra lot.
Drei Wocha nochher, en der Nacht,
Do hot's oms Häusle taun und kracht!
Em Bächle kommt a Gieß derher
Wia wenn a Wolk neing'falla wär.
'S Matheisa Häusle wacklat schaun,
Do geant se halt uf ond dervaun.
Ond wia se so da Berg nuf send
Mit Sack und Pack, mit Viech ond Kend,
No sait sein Weib: "Wia guat ischt's au,
Daß miar ons hent versichra laun!"