Text:Otto Gittinger/So semmer Leut/Streube

Streube

Am Jakobsbronna dren em Wald
Do macha drei Radfahrer Halt.
Der Tag ischt heiß, der Weg ischt steil,
Se schiaba schwer an iare Gäul!
Wia tuat en's Gruba doch so wohl
Ond Wasser, ganze Mäuler voll!
Bhäb neb'am Bronna dran wachst frisch
A Haufa-n-Adlerfarrabüsch.
Do reißt der ein a Handvoll a
Ond steckt's rengs rom an Radsitz nan.
De andere macha's noch, ond glei
Send d'Räder voll Farnwedel g'sein.
Jetz kommt, wia grad no wird g'hantiaret,
A Bauer ond sei Bua g'maschiaret,
Dia sean dem Dengs a Weile zua,
No sait der pfiffich Baurabua:
"Gelt, Vater, dia send g'wiß aus Bada
Ond tean do hüba Streube lada."