Text:Otto Gittinger/So semmer Leut/Wonderkur

Wonderkur

A Schneider hot en Maga g'het,
Der hot en all'weil druckt.
S' bescht Essa g'schmeckt em Schneider net,
Es druckt an, kaum ischt's g'schluckt.

Er goht zum Wonderdoktor nan
Ond klägt sein Magaleid.
Der sait: "Des lot se macha, Man,
Jo freile", hot er g'sait.

Er schläft da Schneider ein, ond schnell
Nemmt er sein Maga raus
Ond wäscht an draußa-n-an der Quell
Em frischa Wasser aus.

No hängt er'n an sein Gartahag
En d'Sonn a wenga nan,
Daß do der traurich Schneidersmag
So recht verlufta kan.

Kaum hangt er do em Sonnaschein,
No sprengt a Hond derher,
Ond schnappt den Schneidersmaga nein,
Wia wann's a Knackwurst wär.

Was taun?! jetz macht der Doktor schnell
Sein alta Gaisbock hein
Ond setzt em Schneider uf der Stell
Da Gaisamaga-n-ein.

Ond wia der Schneider ischt verwacht,
No ischt er wieder g'sond.
Glei packt er an ond ißt ond lacht,
Mer sait em's net vom Hond.

Jetz, wann mer'n frogt, wia's bei-n-am steh,
Heißt's: besser, als mer glaub,
Bloß wann er so dur d'Hecka geh,
No g'luscht's an arg noch Laub.