Trailer Park Boys

Seriedate
Originaltitel:	Trailer Park Boys
Produktionsland:	Kanada
Produktionsjohr:	22. April 2001– 7.Dezember 2008
Längi von erä Folg:	öbbe 22 Minute
Zahl vo de Folge:	55 (+ 2 Extrafolge)
Originalsproch:	Änglisch
Idee:	Mike Clattenburg
Genre:	Comedy, Sitcom
Erstusstrahlig:	22. April 2001 (Kanada) auf Showcase
Erstusstrahlig (de):	15. Januar 2007
Bsetzig
Robb Wells: Ricky John Paul Tremblay: Julian Mike Smith: Bubbles John Dunsworth: Jim Lahey Patrick Roach: Randy Lucy Decoutere: Lucy Sarah E. Dunsworth: Sarah

Trailer Park Boys isch e kanadischi Comedy-Serie wo vum Mike Clattenburg produziert worde isch. Si handlet vum Alltag vo de Bewohner vo de fiktive Wohnwaagesiidlig Sunyvale Trailer Park aa de Oschtküscht vo Kanada. D Show isch im Stil vun ere Mockumentary gmacht, si isch also so gfilmt, das es schynt wie wenn es e Dokumentarfilm wär. So wird s Kamerateam vilmool au direkt aagsproche bzw. niidergschlo oder niidergschosse.

D Show isch vo 2001 bis 2008 mit sibe Stafle un zwoo extra-Folge produziert worde un uff em kanadische Sänder Showcase gsändet worde. Usserdäm sin zwee Film, Trailer Park Boys: The Movie un Trailer Park Boys: Countdown to Liquor Day, produziert worde. D Staffle werde vo Alliance Films in Kanada, de USA un Bermuda uff DVD vertriibe.

Trailer Park Boys gilt als eini vo de erfolgrychste kanadische Fernsehserie.

Handlig

Jedi Staffle het e äänlichi Handlig. Es beginnt meischt demit dass de Julian un de Ricky ussem Gfängniss entlo werde un in de Sunyvale Trailer Park, e Wohnwagesiidlig in dr Nööchi vo Dartmouth, Neuschottland, heimchömme. D Handlig drait sich deno um d Plän vum Julian un em Ricky, schnäll viil Gäld z verdiene, oder au eifach über d Runde z cho. Die Plän sin in de Regel halb-kriminell bis kriminell, wie au d Tätigkeite vo de meischte andre Bewohner vo Sunyvale. Dezue ghöre vorallem s Aabaue vo groossi Menge vo Marihuana un chlynri Verbreche (Benzin-, Ychaufswäge-, Gäldautomat un/oder Läbensmitteldiebstaal, Alkoholschmuggel, DVD-Piraterii usw.). Schlussändli schytre si meischt wäge de Störaktione vum Trailer Park Supervisor Lahey un ihrer eigne Inkompetenz, un lande wiider im Gfängniss. Am Änd vo de 6. Staffel schliesse si deno Friide mit em Lahey un schaffe es in de 7. Staffel, ändli mit emene groosse Marihuana-Schmuggel viil Gäld z verdiene.

Rolle

• De Julian (John Paul Tremblay) isch de Hauptdarsteller vo de Serie. Er het s Zyl schnäll rych z werde un sich deno zur Rue z setze. Zume des Zyl z erreiche versuecht er meischt verschidni kriminelli Akitiväte wie Alkoholschmuggel, gstooleni Wynachtsbäum oder Grill verchaufe, Grosshandel mit em Marihuana wo de Ricky aabaut un äänlichs. Einewäg het er im Prinzip hochi moralischi Wärt un goot numme illegali Tätigkeite nooch wyl er hofft deno en bessers Läbe aazfange. Er versuecht au syn schmutzigs Gäld uff de Bank aazlege oder demit ehrlichi Tätigkeite uffzbaue („gonna set up some semi-legit businesses round the park“). Usserdäm bildet er sich mit Biecher wyter. Zitewys wott er de Park verloo un en ehrliche Beruef lehre, was aber jeds Mool vum Ricky verhindret wird. Er het in jedere Situation en Glas Rum un Cola in de Hand, sogar bi Raubüberfäll un Schiessereie.

• De Ricky (Robb Wells) isch de bescht Fründ un „Gschäftspartner“ vum Julian. Syni Lieblingstätigkeite sin suufe, Marihuana rauche un Chips, Würscht un Poulet ässe. Er isch nit bsunders gscheit, het es numme bis zur 9. Klass gschafft (bestoot aber wääred de Serie d Priefig für d 10. Klass), isch strytsüchtig un het schnell de Finger uffem Abzug. Defür isch er en Expert bim Aabaue vo Marihuana, Spritabzapfe, un legaleri Tätigkeite wie Autoreparature. Er het kei bsunders grosses Verantwortigkeitsgfiel, un es isch em meischt glych was für Folge un Konsequenze syni Handlige für andri hen („it’s no big deal“). Er liebt aber syni Familie, d Lucy un syni Dochter Trinity, un versuecht ällewell ene es bessres Läbe z biete. Zume des mache bricht er meischt s Gsetz, het aber au mängmool zeigt das er veranwortigsvolli Jobs cha übernee. Für de Grossdeil vo de Stafle läbt er in eme schrottryffe 1975 Chrysler New Yorker, wo „shitmobile“ gnännt wird wyl es chuum no fäärt, numme drüü Türe het un mit verschidni bruuni un grieni Farbtön überstriche isch. Er isch für syni Versprecher bzw. Unkenntniss vo Fremdwörter un Redewendige bekannt, wo vo de Produzuente als „richyisms“ bezeichnet werde. So spricht er zum Byspil s Wort „raccoon“ als „raycan“ uss, sait „denial and error“, „he passed with flying carpets“ oder „worst case Ontario“ statt „trial and error“, „passed with flying colours“ un „worst case scenario“. Er het usserdäm grossi Mie Sätz z bilde ohni debi z flueche. Wäge däm wird em sogar erlaubt vor Gericht z flueche, wyl er sunscht nit in de Lag wär sich z verteidige („if I can’t smoke and swear I'm fucked!“).

• De Bubbles (Mike Smith) isch de bescht Fründ vum Julian un vum Ricky. Syn echte Name wird nie erwäänt, er wird Bubbles (ängl. „Seifebloose“) gnännt wyl Seifebloose zue syne Lieblingsbschäftige ghöre. Er isch syt dass er 5i isch en Waisechind. Syni Erkennigsmerchmool sin en breite Oschtküschte-Dialäkt un dicki Brillegläser. Er isch meischt entsetzt vo de Macheschafte vum Julian un vum Ricky, macht aber wiiderwillig mit, un versuecht si wenn mögli zur Vernunft z bringe. Vum Ray wird er als „the smartest guy in the park“ bezeichnet. Syn Läbensunterhalt verdient er demit, dass er Ychaufswäge vo de Parkplätz vo Supermärkt stielt, si repariert un deno aa andri Supermärkt verchauft. Mit däm Gäld ernäärt er sich sälber un d Chatze vo Sunyvale, wonner als syni einzigi Familie bezeichnet.

• De Jim Lahey (John Dunsworth) isch de Antiheld vo de Serie. Er isch de Uffseher vum Sunyvale Trailer Park (Trailer Park Supervisor) un versuecht ällewell d Läbensbedingige in de Wohnwagesiidlig z verbessre („all I wanted was to make Sunyvale a better place to live“). Die Verbessrige heisse für ihn in de Regel, dass er versuecht de Ricky un de Julian bi ihrene Gsetzesverstööss z überfiere. Er isch friener en idealistische Polizeibeamte gsi, wo wäge eme Schnitzer vo de jugendliche Ricky un Julian syni Stell verlore het. Er het deno d Stell als Trailer Park Supervisor aagno un sich wääred de Joor zumene verbitterete Alkoholiker gwandlet. Er verbringt de Grossdeil vo synrer Zit demit de Julian un de Ricky bi ihrene illegale Aktivitäte z beschatte, un vernoochlässigt wäge däm syni eigetlichi Pflichte. Er schyteret in de Regel, wyl er es versüumt Bewys z sammle, un wyl ihm d Polizei inzwüsche kei Glaube mee schänkt. Er isch friener mit de Bsitzeri vo de Wohnwagesiidlig, de Barbara Lahey verhüürootet gsi. Syt das si en wäge sym Alkoholismus verlo het läbt er mit sym Assistent Randy zämme. In de 3. Staffel wird bekannt das die beide bisexuel sin, un e Beziehig mitenand hen.

• Randy

• Lucy

• Trinity

• Sarah

• Cory and Trevor

• J-Roc

• De Ray (Barrie Dunn) isch de Vater vum Ricky. Er isch friener en Laschwagefaarer gsi, het aber syn Füererschyn verlore wonner bsoffe e Poschtbüro grammt het. Deno het er vo Sozialhilfe gläbt, mit em Vorwand dass er nümm laufe chönnt. Er bezeichnet sich sälber vilmool als „the guy in the chair“, au wenn jede weiss dass er eigetli nit behinderet isch. In de 5. Stafle wird syn Betrug entdeckt un er chunt für e Zit in s Gfängniss. Näbe exessivem Alkoholkonsum isch eini vo syne Marotte, das er, statt uff emene WC, in leeri Plaschtikflasche uriniert. Die Flasche loot er deno im ganze Park verstreut liege, was er als e Aagwohnheit als Laschtwagefaarer entschuldigt. Wäge däm sait de Bubbles emool das d Wohnwaagesiidlig „the land of piss-jugs“ wäri. Usserdäm isch er Glücksspiilsüchtig. Einewäg isch er tief religiös un bezeichnet sich als Calvinist. Es aber änder so dass er d Prädestinations-Doktrin so verstoot, dass er für syn Verhalte nit verantwortlig isch, aasunschte het er relativ wenig Aanig vum Calvinismus oder vum Chrischtetum überhaupt. Wo syn Wohnwage vum Ricky uss Versänne abebrännt wird, läbt er e Zitlang uff enere Mülldeponi, derf aber nooch ere Verybarig zwüschem Julian, Ricky un Bubble un em Jim Lahey wiider zrugg, un wird Assistant Trailer Park Supervisor (syni Tätigkeite beschränke sich aber druff, dass er dur d Wohnwagesiidlig fährt un de Lüt zuewinke tuet).

Rezeption

Trailer Park Boys isch für de kanadischi Sänder Showcase en groosse Erfolg gsi, un di am hööchste bewerteti kanadischi Sändig vum Sänder. In de dritte Staffel het d Serie z Kanada im Durchschnitt öbe 300.000 Zueschauer pro Episode gha.

Es isch Wältwyt ussgstraalt worde, so z Australie uff The Comedy Channel, z Grossbritanie un Spanie uff Paramount Comedy, z Irland uff Channel 6, z Island uff SkjárEinn, z Neuseeland uff TV 2, z Israel uff Xtra Hot, in de Niiderlande uff Comedy Central Netherlands, z Dänemark uff DR2, z Portugal uff SIC Radical, z Dütschland uff Comedy Central Germany, z Finland uff Nelonen, z Bulgarie uff Nova Television un z Pole uff Comedy Central Polska.

In de USA isch ursprüngli uff BBC America e zensierti Version gloffe, wo aber inzwüsche nümmi ussgstraalt wird. Syt 2009 wird d Serie dört vo The 101 Network unzensiert ussgstraalt.

Weblink

• Offizielli Websyte
• Trailer Park Boys uff de Syte vum TV-Sender Showcase