Dr Trojaanisch Chrieg

Dr Trojaanisch Chrieg isch e zentraals Eräignis vo dr griechische und dr röömische Müthologii. Im Homer si Ilias beschribt die entschäidende Chriegsszeene wääred dr Belaagerig vo dr Stadt Troja (Ilion) dur d Armee vo de Grieche, wo in dr Ilias mäistens Achaier, sältener Danaer oder Argiver häisse. Im Ganze wird nume über 51 Dääg vo dr Belaagerig brichdet, wo zää Joor duurt het. Anderi Eräigniss si dur anderi Epos innerhalb vom sognennte eepische Züklus überliiferet.

Kampf bi de Schiff vo Troja, Attische Sarkofaag, Archäologischs Museum vo Thessaloniki, zwäits Viertel vom 3. Joorhundert
Dr Brand vo Troja (Adam Elsheimer öbbe 1600)

Was dr Trojaanisch Chrieg veruursacht het, isch d Entfüerig vo dr Helena gsi, dr Frau vom Menelaos, dur e Paris, dr Soon vom trojaanische Köönig Priamos. Druf si die veräinte Grieche gege Troja zooge, zum sich z rääche. Zää Joor häi si ooni Erfolg brobiert, die stark befestigti Stadt z eroobere. Uf e Root vom Odysseus aane häi d Grieche schliesslig e groosses Ross us Holz baut, wo sich iiri dapferste Chrieger din versteckt häi. Die andere Grieche häi sich uf iiri Schiff zruggzooge und dr gliiche doo, wie wenn si wurde abfaare. D Trojaaner häi s Ross in d Stadt iine brocht, au wenn d Kassandra und dr Briester Laokoon drvor gwarnt häi. In dr Nacht si d Grieche us iirem Versteck uuseklätteret, häi d Stadtdoor ufgmacht, so dass die griechischi Armee Troja het chönne eroobere.

Vo deere Gschicht chunnt dr Begriff vom Trojaanische Pfärd, wo bis hüte gängig isch.

In ere andere Wersioon häisst s, ass d Grieche s Ross so grooss baut häige, dass es nit dur Door vo Troja basst häig. So häige denn d Trojaaner e Loch in iiri äigene Stadtmuure gmacht, zum s Ross chönne in d Stadt iine hoole.

KwelleBearbeite

Dr Ardikel «Trojanischer Krieg» uf dr dütsche Wikipedia

LiteraturBearbeite

  • Engelbert Drerup: Trojanischer Krieg. In: Wilhelm Heinrich Roscher (Hrsg.): Ausführliches Lexikon der griechischen und römischen Mythologie. Band 5, Leipzig 1924, Sp. 1232–1261 (Digitalisat).
  • Mythos Troja. Staatliche Antikensammlung und Glyptothek München. Uusegee vom Raimund Wünsche. Staatligi Antikesammlig und Glyptothek, Münche 2006, ISBN 978-3-933200-11-2, ISBN 3-933200-11-3.
  • Barry Strauss: Der Trojanische Krieg. Mythos und Wahrheit. Theiss, Stuttgart 2008, ISBN 978-3-8062-2154-1.
  • Michael Wood: In Search of the Trojan War. 2. Uflaag. Berkeley 1996.

WeblinggBearbeite

  Commons: Trojanischer Krieg – Sammlig vo Multimediadateie