D Union vo Protestantische Kiirche vom Elsass und vo Lothringe

D Union vo de Protestantische Kiirche vom Elsass und Lothringe (französisch: Union des Églises protestantes d’Alsace et de Lorraine, abkürzt UEPAL) isch e Zämmeschluss vo de Protestantische Kiirche vom Augsburgische Bekenntniss vom Elsass und Lothringe (Église protestante de la Confession d’Augsbourg d’Alsace et de Lorraine, EPCAAL) und vo de Reformierte Kiirche vom Elsass und Lothringe (Église protestante réformée d’Alsace et de Lorraine, EPRAL), wo bäidi Kiirche mit em Status von ere Körperschaft vom öffentlige Rächt si (établissement public du culte). Die bäide Kiirche si Mitgliid in dr Fédération protestante de France (FPF), em Protestantische Bund vo Frankriich. Zämme häi si öbbe 250'000 Gmäindigliider, wo vo 250 Gäistlige bedröit wärde. Vier Fümftel ghöre zur lutherische EPCAAL, äi Fümftel zur calvinistische EPRAL.

Dr Sitz vo dr UEPAL im alte protestantische Seminar am Quai Saint-Thomas z Stroossburg

Die organisatorischi Union isch per Regierigsdekret vom 18. April 2006 formell bildet worde. Am 7. Mai 2006 het mä d Gründig mit eme Festgottesdienst in dr Thomaskiirche z Stroossburg gfiirt. D Union het d Ufgoob, d Verantwortig für gmäinsami Aktiwidääte z übernee und d Beziejige zwüsche de bäide evangelische Kiirche im Elsass und im lothringische Moseldepartemänt z sterke. D Kiirche chönne beschliesse, wievil Zueständigkäite si an d Union wäi delegiere, si bhalte iiri äigene Strukture und blibe Mitgliider vo iire äigene internazionale Organisazione.

Bi dr erste Vollversammlig 2006 isch dr ehemoolig Dekan vo dr Fakultäät für evangelischi Theologii an dr Uniwersidäät Stroossburg und Bresidänt vo dr EPCAAL Jean-François-Collange zum erste Bresidänt vo dr UEPAL gweelt worde. D Amtszit isch drei Joor, 2009 isch dr Collange im Amt bestätigt worde. D Bresidänte vo de bäide Däilkiirche si zur Zit dr Jean-François-Collange (EPCAAL) und dr Jean-Paul Humbert (EPRAL).

Weblingg

• Offizielli Website

Fuessnoote

Dä Artikel basiert uff ere fräie Übersetzig vum Artikel „Union_Protestantischer_Kirchen_von_Elsass_und_Lothringen“ vu de dütsche Wikipedia. E Liste vu de Autore un Versione isch do z finde.