United-Airlines-Flug 811

Dialäkt: Bärndütsch

Am 24. Februar 1989 het d Frachttüre vom United-Airlines-Flug 811 wäret em Flug la gah. Es isch zum ne explosive Druckabfall cho. Dür dä sy nüün Passagier inklusive ihrne Sitze us em Flugzüüg gsoge worden u umcho.

United-Airlines-Flug 811
D Boeing 747-122 bevor d Frachttüre het lagah
Unfall-Zusammenfassung
Uufallart	Strukturells versage bi der Frachttüre
Ort	Pazifik i der Neechi vo Vereinigte Staaten Honolulu z Hawaii
Datum	24. Februar 1989
Todesopfer	9
Lüt, wo überläbt hän	346
Verletzti	38
Luftfahrzüüg
Luftfahrzüügtyp	Boeing 747-122
Betriiber	United Airlines
Kännzeiche	N4713U
Flugnummere	UA811
Abflughafe	Vereinigte Staaten Los Angeles International Airport
1. Zwüschelandig	Vereinigte Staaten Flughafe Honolulu
2. Zwüschelandig	Nöiseeland Flughafe Ouckländ
Zilflughafe	Australien Flughafe Sydney
Passagier	337
Besatzig	18

Der Unfallhärgang

D Boeing 747-122 vo der United Airlines isch am 24. Februar 1989 vom Los Angeles us nach Honolulu gfloge. Vo dert us hätti der Flüüger nach Ouckländ, z Neuseeland wyter sölle. Ds Ziil vom Flüüger isch Sydney z Oustralie gsi. Ds Flugzüüg mit dem Kennzeiche N4713U het 337 Passagier, 15 Flugbegleiter u 3 Pilote a Bord gha.

Öppe 16 Minute nach em Abflug vo Honolulu nach Ouckländ, no wäret em Steigflug, in ere Höchi vo öppe 22.500 Fuess (6900 m) u öppe 108 km (58 Seemeile) vo Honolulu e wäg, het sech di vorderi Frachtruumtüre sälber ufgmacht. Das het zum ne explosive Druckabfall im Flugzüügrumpf gfüehrt. D Frachttüre het’s du vollständig abgriissen u het e Teil vo der Rumpfverchleidig mit gno. Es het es Loch über der Frachttüre gä. Das Loch het e grössi vo öppe vier mal vierehalb Meter gha. Füüf Sitzreihe us der Bisnessklass sy dür e Druckabfall us em Flugzüüg gsoge worde. Uf dene Sitze sy nüün Passagier gsässe. Ei Flugbegleitere, wo i der Neechi vom Loch isch gstande, het sech bi däm Zwüschefall schwär verletzt.

Wäg em Druckabfall hei d Pilote e Notsinkflug ygleitet. I gringerer Höchi isch der Surstoff-Patizialdruck höcher u d Pilote u d Passagier bruuche de kei Surstoffmaske zum Schnufe. Dür e Druckabfall sy Teili vo der Türe im Triibwärch 3 glandet. Ds Triibwärch 3 isch du uusgfalle. Ds Triibwärch 4 het äbefalls schade gno u het sogar afa brönne. D Klappe sy ou beschädiget worde. Trotz de Schäde am Rumpf, Triibwärch u Klappe, sy d Pilote sicher uf em Flughafe z Honolulu glandet. Ds Flugzüüg het innerhalb vo 90 Sekunde chönne über d Notrutsche ewaquiert wärde. D Passagier sy derby nid no zuesätzlech verletzt worde.

Ursach

Der Vorfall isch höchschtwahrschinlech dür ne falschi Verkabelig, verbunde mit e mene schlächte Verschlussmechanismus vo der Frachtluke usglöst worde. Zu dere Zyt het d 100er Version vo der 747 no kes Sichtfänschterli gha, wo bündig mit der Frachtluke hätti abgschlosse, so das d Bodecrew hätti chönne prüefe, öp der Bügel vo der Türe uf “Verschliesse” gstanden isch oder nid. Es het mehreri Mängel im Design gä: Me het der Verschlussmechanismus nid naach gnueg u vollständig chönne yluege. Zudäm het der Schaltchreis, wo d Stromversorgig für d Frachtluke greglet het, e defekt gha u het so wäret em Flug chönne uslöse u so d Frachtluke ufmache. D Frachtluke, wo nach usse gangen isch, isch so eifach ufgsprängt u vom Rumpf abtrennt worde. Da derby het d Frachttüre e Teil vo der Rumpfverchleidig mit sech grisse u dür das isch d Fluggaschtkabine in ere Höchi vo 22.500 Fuess em dört herrschende Luftdruck usgsetzt gsi.

Ursachienermittlige

D neuseeländer Kevin u Susan Campbell, wo bim Unglück ihre Sohn der Lee Campbell verlore hei, hei Gäld gsammlet u d Bergig vo der Frachtluke zahlt. So het me am 26. Septämber u am 1. Oktober 1990 zwöi Teili vo der Frachttüre us em Pazifik chönne bärge.

D Campbells hei eigeti Nachforschigen agstellt um usezfinde, was der Grund für der explosiv Druckabfall isch gsi. Ihri Nachforschige hei ergäh, dass e Konstruktionsfähle am Verschlussmechanismus vo der Frachttüre isch vorgläge. Zwee späteri Vorfäll stütze d Hypothese vo de Campbells:

Ds Loch im Flugzüügrumpf.

Im Jahr 1991 isch es erneut zum ne Zwüschefall cho, bi däm sech e Frachtluke vo nere Boeing 747 vo der United Airlines uf em New Yorker Flughafe JFK vo sälber ufta het. Es het e Sicherig use gjagt u ds Wartigspersonal isch grad uf der Suechi gsi nach em Grund derfür. Währet der Diagnose isch es zu nere unbeabsichtigte Uslösig vom Verschlussmechanismus für d Frachtluke cho. Dür das het sech d Luke sälber ufgmacht. D Sälbschtöffnig vo der Luke het zu ähnleche Schäde gfüehrt, wi d Schäde wo me a der Frachttüre vom Flug 811 fescht gstellt het.

E wyteri Störig an ere Frachtluke vo nere 747 vo der Pan Am z London-Heathrow, het der Härsteller Boeing derzue veralasst, alli Chunde um d Behäbig vo der Störig z bitte. D FAA het d Frischt bis der Mechanismus het müesse ustuscht sy uf 30 Tag verchürzt. Ursprünglech wär e Frischt vorgseh gsi wo’s de Fluggsellschafte ermüglechet hätti das bi der nächschte reguläre Wartig z mache.

Untersuechigsergäbnis

Di usegsprängti Frachttüre vom Flug 811

Di US-amerikanischi Transportsicherheitsbehörde het ufgrund vo der Untersuechig wo si agstellt het, e dringendi Empfählig für alli im Dienscht befindleche Boeing 747-100 usegä. Der Verschlussmechanismus söll dür nid fählerhafti Verschlüss ersetzt wärde. E wyteri nid verbindlechi Empfählig het sech derfür usgsproche, alli Frachtluke wo nach usse ufgö, dür Luke z ersetze wo nach inne ufgö, so das der Kabinedruck d Frachttüre gäge Rahme drückt. Syt däm Vorfall het’s kei glychglagerete Unfall meh gä, mit ere Boeing 747-100.

Nach em Unfall

Im Jahr 1989 het d Crew, vom Flug United-Airlines-Flug 811, e Uszeichnig vom United States Secretary of Transportation übercho. Ds Flugzüüg isch repariert worde u mit em Kennzeiche N4724U wieder regischtriert worde. 1990 isch das Flugzüüg du erneut i Dienscht gstellt worde. 1997 isch es a di gambischi Fluggsellschaft Air Dabia verchouft worde. Dert isch ds Flugzüüg under der Regischtrierig C5-FBS gfloge. Nach däm d Gsellschaft der Bertiib ygstellt het, isch ds Flugzüüg im Jahr 2000 uf em Plattsburgh International Airport yglageret u im Jahr 2004 z Plattsburgh, z New York usgschlachtet worde.

D United Airlines hei nach em Unglück zahlrychi Versüech underno, der Verluscht vo der Frachtluke R5 im Flugsimulator nachezstelle. Doch kei Besatzig isch nach em Verluscht vo der Luke i der Lag gsi, d 747 sicher z lande.

Film u Fernseh

• Der Unfallhärgang isch i der Serii Mayday – Alarm im Cockpit, i der zwöite Folg vo der 1. Staffle verfilmt worde. Je nach Episodelischte isch es aber ou di erschti Folg vo der 1. Staffle. Der änglisch Titel lutet Unlocking Disaster (oder ou Explosive Evidence) uf Dütsch isch der Film under em Titel Um Haaresbreite erschiine.
• D TV-Serii Akte X het der Unfall ou dargstellt, het aber d Ursach uf Usserirdischi zrügg gfüehrt.
• Im Dokumentarfilm „Boeing 747 – Die Jumbo-Revolution“ (Im Original „747: The Jumbo Revolution“, GB/USA/NZ 2013) wird d Gschicht vo der Entwicklig u em Ysatz vo der 747 dargstellt, als eine vo de weniger Unfäll vo der 747 wird dä vom Flug 811 dargstellt.

Verglychbari Zwüschefäll

• American-Airlines-Flug 96
• Turkish-Airlines-Flug 981

Weblink

 Commons: United Airlines Flight 811 – Sammlig vo Multimediadateie

• Untersuchungsbericht der NTSB (AAR-92/02) (änglisch, PDF; 3,5 MB)
• Flugunfalldaten und -bericht im Aviation Safety Network
• Abschrift vom Cockpit Voice Recorders

Quelle

Dä Artikel basiert uff ere fräie Übersetzig vu dere Version vum Artikel „United-Airlines-Flug_811“ vu de dütsche Wikipedia. E Liste vu de Autore un Versione isch do z finde.