Ur

Absoluti Johreszahle us em früeie Alterdum si notorisch ungenau. Johreszahle in däm Artikel si Richtlinie und sötte nid z ärnscht gnoh wärde: Für s dritte und zweite Johrduusig vor dr Ziitwändi gits verschideni Standard-Chronologie, wo aber um Johrzähnt von enander abwiiche.

Ur isch ä Schdadt im Süde vom antike Mesopotamie gsi, nid wiit vo dr Mündig vom Euphrat und em Tigris im Persische Golf. Hützudag liige siini Ruine wiit inland wil sich s Meer zruggzoge het. Siini Ruine bilde dr Tell el Mukayyar in dr Nöchi vo dr Schdadt Nasirija südlig vo Bagdad.

Charte vo Mesopotamie.

Ur het eini vo de eltischte menschlige Zivilisatione gha, und isch berüehmt wäge siiner Zikkurat, wo zimli guet erhalten isch.

Schdadtbild

Ur isch von erä Schdadtmuure umgä gsi, wo au die beide Häfe am Euphrat gschützt het. Im Norde vo dr Schdadt isch s Quardier vom Mondgott Nanna gsi, wo dr Hauptgott vo dr Schdadt gsi isch. Dr König Ur-nammu het do öbbe um 2125 vor dr Ziitwändi ä riisigi Zikkurat baut. In dr Nöchi vo dr Zikkurat isch dr Echursanga Balascht, wo währed dr dritte Dynaschtii vo Ur baut worden isch und dr Königsbalascht vom Ur-Nammu und vom Schulgi gsi isch. Än andere Tämpel, s Egipar Heiligdum vom Gott Ningal, isch in dr gliiche Periode baut worde. 200 Meter südlig vo dr Zikkurat si d Königsgreber vo Ur uus em 26. Johrhundert im enä Friidhof mit meh as 2000 Greber. Näb em Friidhof si die monumentale Grabaalage vo de König vo dr dritte Dynaschtii. Im Süde vo dr Schdadt het mä Wohnhüüser gfunde, wo ehnder chlii gsi si und um Innehöf umebaut gsi si.

In dr Ziit vo de Kassite (14. Johrhundert vor dr Ziitwändi) und au under de Assyrer isch dr Tämpel vo dr Nanna renoviert worde. Währed dr Neubabylonische Ziit isch s Nanna Quartier vergrösseret worde und mä het ä riisige Muure drum ume baut. Im Norde vo dr Schdadt isch aä groosse Balascht für em König Nabonid si Dochder, dr Belschaltinanna, baut worde.

Gschicht

D Schdandarte vo Ur

D König vo dr erschte Dynaschtii vo Ur, wo vom König Mesannepada, em Sohn vom Meskalamdug gründet worden isch, si d Herrscher über ganz Sumer worde. Ihri Hegemonie isch vom Sargon vo Akkad öbbe 2340 broche worde. Die dritti Dynaschtii vo Ur isch vom Ur-Nammu (öbbe 2112-2049) gründet worde. Er het ä Gsetzsammlig, dr Ur-nammu Kodex, wo drei Johrhundert elter as dä vom Hammurapi isch, iigfüehrt und die groossi Zikkurat baut. Er isch no zu Läbziite vergöttligt worde und ä Heldefigur in dr sumerische Literatur worde. Under em Ur-nammu siine Nochfolger, em Schulgi, Bursin, Schusin, Ibbisin, isch Ur die gröschti Schdadt vo dr ganze Wält worde und het öbbe 65.000 Iiwohner gha. Dr Schulgi macht d Schdadtkönig zu siine Brovinzschdatthalter. Dr Schusin baut Feschtige am middlere Euphrat gege weschtsemitischi Schdämm. Öbbe 1950 hai d Elamite d Schdadt eroberet und schbööter d Babylonier. Dr Nebukadrezzar II. het im 6. Johrhundert vor dr Ziitwändi in dr Schdadt neui Gebäud errichtet und dr Nabonid het d Zikkurat usbesseret. Aber d Schdadt isch langsame undergange vo 550 a und fufzig Johr schbööter scho nüme bewohnt gsi. Dr Grund drfür isch unbekannt; mä dänggt ass dr Hafe unbruuchbar worden isch wil dr Euphrat si Lauf gänderet haig oder wäge Versandig.

Quelle

• I. E. S. Edwards ed., The Cambridge Ancient History, 2. Deil, 1. Band, Cambridge University Press 1925, ISBN 0-521-07791-5
• dtv-Atlas zur Weltgeschichte, Band 1, Deutscher Taschenbuch Verlag 1970