De Welchanos (griechisch Ϝελχάνος) isch en antike kretische Gott gsii, wo möglicherwiis ufene minoische Fruchtbarkaitsgott zruggoot.[1]. För en isch e Fest, d Welchania (Ϝελχάνια), i de kretische Stadt Lyktos bizügt und e Monatsname i de Städt Knossos (Ἐλχάνιος, Elchánios) und Gortyn (Ϝευχάνος, Weuchánios), vermuetli e Früeligsmonet. De antiki Lexikograph Hesychios setzt en mitem Zeus gliich: Gelchanos (Γελχάνος), de Zeus bi de Kreter. Di verschidene Schriibwiise sind e Folg vo de underschidliche kretische Tielekt und o, well s Digamma (ϝ) as Buechstabe nume i de Früezitt bruucht woren isch.

De Welchanos werd uf Münze us de kretische Stadt Phaistos (um 320 v. Chr.) as e blutte Jüngling dargstellt, wo ufeme Bommstrunk sitzt und e Güggel i de rechte Hand hebt. I de nöchi vo Phaistos isch öber de Ruine vom Minoische Palast z Hagia Triada e Tempel vom Welchanos gstande, wie zaalriichi Ziegel mitem Name vom Welchanos bizüüget.[2]

Anzelnoowiis ändere

  1. Harry Reginald Hall: The oldest civilization of Greece. Studies of the Mycenaean age. Nutt, London 1901. S. 204.
  2. Costis Davaras: Guide to Cretan Antiquities. ISBN 0-8155-5044-8. S. 344.

Literatur ändere

  • Costis Davaras: Guide to Cretan Antiquities. ISBN 0-8155-5044-8. S. 344, Stichwort Welchanos.
  • Vassiliki Machaira: Ϝelchanos. In: Lexicon Iconographicum Mythologiae Classicae (LIMC). Band VIII, Zürich/München 1997, S. 299–300.