Pressemitteilung zom 5000. Artikel vu dr schwäbisch-alemannischa Wikipedia

Mr feired dr 5000. Artikel vo dr schwäbisch-alemannischa Wikipedia.

Em September 2003 hodd dia elsässischa Wikipedia aagfanga und hodd sich dann zom gröschda Lexiko en dr alemannischa Sproch endwickld. Ond des verbendad au übr dia heitige Sprocha weg a haufa Leid: d' Badener ond Würdaberger, d' Schwoaba us Bayern, d' Elässer, dia aus Vorarlberg, d' Liechtasteuner, dia von dr deitscha Schweiz ond au dia Walser em Norda von Italia. Am 8.05.2009 hand se jetzt en dr alemannischa Wikipedia mit ma Beitrog übr Hunspach da 5000. Artikl naabrocht.

Des Online-Lexiko Wikipedia isch jetzt scho lang ois von de beliebteschte Nachschlagwerk von dr ganza Weld. De meischte kennat dia Versiona uff Englisch, Deitsch ond Franzesisch. Do gibts aber au no Wikipdia en iber 250 andere Sprocha, sogar exotische wia Tagalog odr Yoruba. Ond au fürd sottige, dia liaber an Dialekt mögat, geits do oine uf Bairisch, Plattdütsch odr Alemanisch.

Wias von dr elsässischa zur alemannischa Wikipedia komma isch

Do isch a elsässischer Maa gwäa, der hot Alexis Dufrenoy ghoisa ond isch Informatiker gwäa ond der hodd em September 2003 bei dr Wikipedia Foudation en Amerika nochgfrogt, ob ma eingentlich ed au a Wikipedia en elsässisch macha kennd. Ond do drmit hodd er no a richtiga Debatt em Enternet ausglest ob ma au no a Wikipedia en älle Dialekt brauchd. Ond en dia Dikussio hodd sich jetzt dr Wikipedia-Grinder Jimmy Wales eigmischt ond well der dafiar gwäa isch, deswega hodd des klappt mit dera "Elsässischa Wikipedia".

Em erschda Johr isch do allerdengs ed vill passierd en dera elsässischa Internetenziklopädie. Dr Dufrenoy schaft en dera Zeit en Paris ond hodd au gar koi Zeid meh fr sei elsässische Artikel ghedd. Ond well ma do au koine andere Elsässer gfonda hodd, wärs mit dr elsässische Wikipedia fascht scho aus gwäa no bevor s recht angfanga hodd. Auf oimal hand aber au andere Dialektfans des Projekt entdeckt ond zwar dr "Chlämens" aus em badischa Rheinfelda, dr "Melancholie" aus em bayrischa Allgäu, dr "J. 'mach' Wust" aus Bern". Dia hend dann vorgschlaga, dass ma d elsässische Wikipedia zu ra Enziklopädie fiar älle allemanische Dialekt erweidra kennd. Ond so isch dann em November 2004 d "Alemannische Wikipedia" entstanda.

A schwäbisch-alemannischs Lexiko

D alemannische Wikipedia isch bloß a kloinr Doil von dr ganza Wikipedia. S geid so rond zwanzich Autora, dia emmer odr efter aktiv send, aber au Honderte, dia edd so oft odr au blos oimal was gschrieba hend. So fend mr au Artikel in dr Alemannischa Wikipedia uff Züritüütsch, uff Bärndütsch, uff Wallisertiitsch, uff Vorarlbergerisch, uff Markgräflerisch, uff Schwäbisch ond uff Elsässisch. Sogar aus em Piemont en Italia hodd oiner ebbes gschrieba, em a Walserdialekt vom kloina Flecka Alagna Valsesia, wo sech no ganz aldertümlich aheerd.

A Haufa Artikl erzähled übr Sacha us de alemannischsprachige Gegenda, s gheid Beidräch übr d Gschicht vum Elsaß, übr dr Kaiserstuhl, übr dr Vierwaldstättersee ond übr d Alamannische Reihengräberfelder. Ond au Artikel übr andere hochwissenschaftliche Sacha, übr dr Albert Einstein ond d Mond vom Planeta Jupiter, übr dr Barack Obama, ond sogar übr dr Harry Potter ond dia Britney Spears hodd oiner ebbes gschrieba.

Übr d Wikipedia

Wikipedia isch a freis Lexiko, des blos vo freiwillige Autora gschrieba worra ischt, ond wo emmer no weider gschrieba werd. Elle Tegschd kenned vo elle Leid korrigiert ond weidergschrieba werda. Dia hand a freia Lizenz, dia elle Leid erlaubd, des koschdalos zum nutza, zverändra odr weiterzverbroidra.

Haubdseid: http://als.wikipedia.org
Profil: http://als.wikipedia.org/wiki/Wikipedia:Profil
Artikel uff Schwäbisch: http://als.wikipedia.org/wiki/Kategorie:Artikel_uf_Schwäbisch
Bsonders guade Artikl: http://als.wikipedia.org/wiki/Wikipedia:Bsunders_glungeni_Artikel
Portal Alemannisch: http://als.wikipedia.org/wiki/Portal:Alemannisch
Portal Alemanne: http://als.wikipedia.org/wiki/Portal:Alemanne

Übr d Wikimedia

D internationale Non-Profit-Organisation Wikimedia hodds Ziel, s freie Wissa zsammla ond zom verbroida. Übr ellem schtoad d Wikimedia Foundation; des isch dia, dia elles am Laufa held, se isch 2003 grindet worra, ond hodd irn Sitz in Florida in Amerika. Seid em Juni 2004 gibts do au a deitscha Gruppe, dia hoised Wikimedia Deutschland - Gesellschaft zur Förderung Freien Wissens e.V., des isch a gmeinnütziger Verei, ond dia hend ern Sitz in Berlin. S Geld fiar Wikimedia kommt blos durch Spenda ond edd von öffentlicha Fördergelder. Wikimedia Foundation Inc. - http://wikimediafoundation.org Wikimedia Deutschland e.V. - http://www.wikimedia.de/

Kontakt

Wenn se no Froga hend, no sended se bitte a email ans Presseteam vu dr schwäbisch-alemannischa Wikipedia odr wended sich an d folgenda Leid. ...