Wikipedia:Wp/swg/Schwäbisch

Schwäbisch isch a deitscher Dialegd, den må em Ländle, also em wirttabergischa Doel fo Bada-Wirttaberg, gschwätzt wird. Dor schwäbische Dialegd isch mid'm Alemannischa ond mid'm Schweizordeitsch vorwand ond ghaird zo de obordeitsche Dialegd. S' Schwäbische ond s´vorwandte Alemannische send em Ibriga am Middlhaochdeitscha nächor drâ wia s'Hoachdeitsche vo heid. Vom Klang her haird sich s'Alemannische wäaga saene vihle i-Laud vorgleichsweis zemmlich hell â, ond's Schwäbische wäaga saene vile a, o und å aejor dongl.

Gschwädsd wird Schwäbisch, voroefachd gsaed, vom Schwarzwald em Weschda âgfanga bis â dor Lech nâ em Oschda, ond vo nerdlich vo Schduagord bis kurz vorem Bodasee em Sida. Em schwäbischa Gebid lebed ogfär faif bis segs Milliona Loid, alde Schwåba ond Raegschmeggde middenandor.

S' geid koe aehaedlicha Schreibweis firr's Schwäbische. Laedor hend d'schwäbische Dialegddichdor und Dialegdschroibor sich bis heid no ed zsemagfonda, wia se's mid'm Schreiba mached kehed. A Beischbihl dorfir: Dor wichdigschde ond heifigschde schwäbische Vokal, s'donkle "a" ("Rådhaus", "Stråß") wird fo de oene als "aa" gschriba, fo de andre als "å" und fo noh andre als "â", wenn se's edd sogar bloß als "a" schreibed.

Em Schwäbischa geids wia iboräll au regionale ond lokale Variaziona. Wia dia aezumdoela send, då driber schdreided sich d'Wissaschaffdlor. Solang då ao ed em endferndeschda a grondsädslicha Iboraestemmong zom erkenna isch, muass's bei dem bleiba, dass Neggorschwäbisch (am Neggor), Oberschwäbisch (uff dor Alb ond en Oborschwåba) ond Bairisch-schwäbisch (zwischa Iller ond Lech) so guad wia älle Schwåba ausmached.