S Beschte wos je hets gits

Zruck zum alemannische Wiktionary

S Beschte wos je hets gits isch s Schwyzer Jugedwort vum Johr 2009. Dää Satz isch bekannt wore dur e Byytrag iber d 3 Jahre Kra.ch-Party z Breitebach am 7. Februar 2009 uf Mash TV, ere Sändig uf em Basler Färnsehsänder Telebasel. In däm Byytrag het dr Reporter Joël von Mutzenbacher jungi Partygescht gfrogt, wie si die Party finde.

Näbe andre isch unter anderem au dr Heshurim Aliu, e 21-jehrige Albaner us Mazedonie vu Zeinige, gfrogt wore zämme mit eme Kolleg, un si hän die Antwort gee:

Kolleg: [Kra.ch isch] ... s(ch)¹ Beschte, s Beschte vom Läbe wo s git -

Aliu: S Beschte, wo git(s)²!

Kolleg: Jo, genau, ey Altä!

Aliu: S Beschte wos je hets gits!

¹ D Ussaag isch erkennbar "s Beschte" (und nit "(i)sch s Beschte" – das "s" tönt aber fasch wie ne "sch" und kennt au "'sch s Beschte" sii (ohni Ussproch vom "i" und mit Zämmezug vom "sch" und em "s")

² S "s" am Änd isch nit wirgglig hörbar; so blibt's offe, ob das wirgglig usgsproche wore isch oder nit

No eigene Aagabe het dr Aliu dää Satz gsait as absichtligi witzigi Verdrillig. S sej e Formle, wu är un syy Brueder scho lenger brucht hätte, e Erwyterig zum Satz S Beschte wo gits.

Wu des Videouusschnitt uf Youtube.com uffeglade woren isch, isch dr Spruch im Lauf vum Johr 2009 in dr ganze Schwyz bekannt wore. Bis zum 14. Dezämber 2009 isch dää Uusschnitt uf Youtube iber 177.000 mol aagluegt wore.

Uf Facebook.com isch derno ne Fangruppe vu däm Satz yygrichtet wore, wu mittlerwyyli iber 18.000 Fans het (Stand 14.12.2009).

Am 3. Dezämber 2009 isch dr Satz zum Schwyzer Jugendwort vum Johr 2009 gwehlt wore vu dr Jury "Schweizer Wort des Jahres". Dr Presidänt vu dr Jury, dr Radiojournalischt Hannes Hug, meint zue däm Satz, är sej e „hegscht kreative Umgang mit Sproch un voller Enthusiasmus.“

Interpretation

Wenn me's genau nimmt, kennti me dr Satz sogar grammatikalisch korräkt interpretiere – indäm einigs gar nit usgschproche (resp. verkürzt oder verschluggt) wird (im folgende das in Klammere): "S Beschte wo's je het ((ggää,) da)s gits"

Sunschtigs

Dr Basler DJ Antoine het us däm Satz e Techno-Track gmacht (S Beschte), wun er uf syym 2009er Album 17 900 uusebrocht het. Uf youtube.com git s no ne Huffe andri 'S Beschte wos je hets gits'-Remix, wu Nutzer uffeglade hän.

Dr Veraastalter vu sällre Party z Breitebach, Kra.ch, het am 30. Mai 2009 z Basel e Party veraastaltet unter em Motto Die beschti Party wos je hets gits. Au dr Domainname www.sbeschtewosjehetsgits.ch het sich kra.ch mittlerwyyli gsicheret.

Au T-Shirts mit däm Satz un eme Bild vum Aliu cha mer chaufe.

Sit em April 2010 dritt dr Heshurim Aliu mit syym Satz uf in eme Färnsehwärbespot fir d Thurgauer Beckerei Sonne-Beck.

Netzgleicher

• Original-Video uf Youtube.com
• dr ganz Mash-TV-Bericht uf Youtube.com
• Fangroup "S' beschte wo s je hets gits" uf Facebook.com
• „Minarettverbot“ das neue Birchermüesli (Basler Zytig, 3.12.2009)
• S Beschte wos je hets gits - Easy (Basler Zytig, 8.12.2009)
• S'beschte wo's je hets gits (NZZ, 16.6.2009)
• Das Kultvideo der Stunde: «S Beschte wos je hets gits» (Tagesanzeiger, 29.04.2009)