Wikipedia:Wp/swg/Frankreich

Frankreich isch s´weschdliche Nochbrland vo Bada-Wirttaberg. D´Grenz isch dor Rhai. Abor där isch heid eigendlich koe Grenz mai. Ond dees isch guad so.

D´schwäbischa Språch hådd a ganz engs Vorhäldnis zom Franzesischa. Seldsammorweis isch em Badischa, dees ja zwischae Wirrtaberg ond Frankreich leid, kaom äbbes franzesischs hänga blieba. Zwåe graose Zsemahäng Franzesisch - Schwäbsich geid´s:

Zom oena hådd´s Schwäbische viel aus´em Franzesischa ibornomma. Vor ällem D´eldore Leid kenned on Haufa Werdor mit franzesischor Herkunfd: Trottwar (franz. trottoir/deitsch Gehweg), Suddrae (Souterain/Untergeschoss), Plaffo (plafond/Zimmerdecke) ond no ganz viele weidore. A baar franzesisch-schwäbische Werdr hend em Deitscha gar koe Entsprechong, zom Beischbiel wief (vif/deitsch am eheschda klug, wendig, fleißig)).

Zom andora geid´s em Franzesischa a ganza Råeh vo so genannde nasale Laud. Genao so hådd ao s´Schwäbische saene Nasale. Mor muas blos amål an "oangnehm" dengga. Jedenfalls dend sich Schialor mit Schwäbisch als Muddorspråch viel leichdor beim lerna vo Franzesisch als dor Reschd vo Deitschland.

Laidr isch´s Vorhäldnis vo Frankreich zo de Schwoba und de Badeneor en dor Vorgangahaed bis gega 1780 zemlich schlemm´gwäa. (Dornåch send se mit sich selbor beschäftgid gwäa, då isch denne ihr Revoluzzio komma). Emmor wiedor hend franzesische Trubba dor Sidweschda vo Deitschland en Angschd ond Schregga vorsedsd. Bsondors schlemm isch dor General Melac gwäa. Där hådd ed blos Heidelberg heegmachd, sondern on Haufa andore Stedt em heidiga Bada-Wirttaberg.

A bsondrs enga Vorbindong geid´s zwischa Paris und Schtuagard mit dr Eisabâ: Dr franzesische TGV fährd vo Paris iber Stråßburg und Karlsrua direggd noch Stuagard nae. Mir Schwoba send en zwåahalb Schtonda en Paris, aber nåch Berlin braucht´s emmor no fascht sieba Schtonda.