S Züüghuus Baasel

Dialäkt: Baseldütsch

Im Züüghuus Baasel an dr Züüghuusstrooss 2 z Baasel isch d Läitig vo dr Rettig Baasel dehäi, eme Beriich vom Justiz- und Sicherhäitsdepartemänt (JSD) vom Kantoon Baasel-Stadt. Speziell isch s au s Zentrum vo dr Abdäilig Milidäär und Ziviilschutz.

S nöije Züüghuus

Säggs Joorhundert lang isch s Baasler Züüghuus am Petersblatz gstande, bis 1914 e nöis Züüghuus bi St. Jakob an dr Züüghuusstrooss Nummere 2 iigweit worde isch.

Im Joor 2019 het d Regierig entschiide, ass s Züüghuus as dr zwäit Standort vom Baasler Rettigsdienst wurd diene. As Gründ drfür isch aagee worde, ass d Iisatzort vo dört schnäller und zueverläässiger chönni erräicht wärde. Ooni e zwäite Standort chönni d Vorgoob vom Interverband für s Rettigswääse, ass d Retter in höggstens 10 Brozänt vo de Notfäll spööter as 15 Minute noch em Notruef döffe aachoo, vom Joor 2025 aa nüm chönni iigghalte wärde. Dr zwäit Standort wurd au e Sanierig vom Geböid an dr Hebelstrooss äifacher mache.

D Abdäilig Milidäär und Ziviilschutz vom JSD

Dr Beriich Milidäär isch entstande, wo mä d Milidäärverwaltig und s Kräiskommando fusioniert het. S Kräiskommando kümmeret sich um die Aaghöörige vo dr Armee us em ganze Kantoon bis zum Ändi vom Weerpflichtalter. Das si öbbe 40'000 Soldate. Dr Ziviilschutz, wo sit Ändi 1998 au im Züüghuus dehäi isch, schafft bi Katastroofe und in Notlaage mit em Bevölkerigsschutz - dr Kantoonsbolizei, dr Füürweer, em Gsundhäitswääse und de Wärk zämme.

Weblingg

• D Website vo dr Rettig Baasel