Älggi-Alp
Dialäkt: Obwaldnerdytsch |
D Älggi-Alp oder churz s Älggi isch diä greeschti Alp i dr Gmäind Sachslä und gheerd a dr Korporazion Sachslä.
Laag und Beschriibig
ändereS Älggi liid hinnä am Chliinä Melchtel ufärä Heechi vo rund 1650 m und isch än erschtuinlich flachi Alp. Wiiteri Alpä i dr Neechi sind Matt und Seefäld midem Seefäldsee.
Näbe verschidenä Alphittä gids hiä oi äs Bärggaschthuis und ä Schiihittä vom Schiklub Sachslä. Zmittst uf dr Alp schtaad ä chliini Chappälä, wo dr häiligä Anna gwichä isch. A bitz hinder dr Chappälä heds äs chliises Pfarrhuisli. Hiä isch eppä dr Pfaarer vo Sachslä i dä Feeriä.
Wer is Älggi wott, cha z Fuäss oder mit dem Bäik det uifä. Äs gid oi ä Faarschtraass ab Sachslä, aber diä isch schmaal und nid bsunders scheen zum Faarä. A dä Wuchenendi gilt d Reglig, dass mä i dä graadä Schtundä is Älggi inä faarä cha und i dä ungraadä Schtundä vom Älggi uisä.
Namä
ändere«Älggi» chund, wie d Fluernamäforschig ärchläärt, vom Namä «Alp-Gau» und bediited es flachs Gländ am Bäärg obe.[1] Mä heig därä Alp oi «Älggibode» gsäit.
Mittelpunkt vo dr Schwiiz
ändereS Älggi gilt als Mittelpunkt vo dr Schwiiz. Das schtimmd aber nid ganz. Will dr äigetlichi Mittelpunkt ächli underhalb vom Älggi imänä Gländ wäär, wo numä schwäär zuägänglich isch (Koordinate 660158 / 183640 ), hed mä nä vor allem us turistischä Grind um eppä 500 Meter verschobä (Koordinate 660557 / 183337 ) und us Schtäi d Umriss vo dr Schwiiz drumumä gmacht.
Weblink
ändereFuessnoote
ändere- ↑ Angelo Garovi: Flurnamen und ihr Bezug zur Kulturlandschaft. uf kulturlandschaft-ow.ch, Kapitel 4: Alpnamen.
Koordinate: 46° 47′ 58,4″ N, 8° 14′ 9,2″ O; CH1903: 660863 / 183464