Alexios I. (Byzanz)

Dr Alexios I. Komnenos, middelgriech. Ἀλέξιος Α' Κομνηνός (* 1048; † 15. August 1118), isch dr byzantinisch Kaiser vo 1081 bis 1118 gsi.

Alexios I. (Byzanz)
Kaiser vom Byzantinische Riich
Dr Alexios I. Komnenos
Regierigsziit	1. April 1081 – 15. August 1118
Chrönig	5. April 1081
Uf d Wält cho	1048
Gstorbe	15. August 1118 (im Alter vo 62)
Vorgänger	Nikephoros III.
Nochfolger	Johannes II.
Verhürotet mit	? Argyre Irene Doukaina

Lääbe

Dr Alexios isch General gsi und vo dr Armee zum Kaiser usgrüeft worde. Er het de Seldschuke Friide gschlosse, und sich mit de Venezianer und em römisch-dütsche Kaiser Heinrich IV. gege d Normanne verbündet. Bi Durazzo het en dr Normanneherzog Robert Guiskard gschlaage und isch denn bis Makedonie vordrunge. Won er uf Italie zrugg isch, het er si Soon Bohemund mit dr Armee in Makedonie gloo und dr Alexios het die Armee vernichdet. 1085 isch dr Robert gstorbe und d Räst vo siner Armee si häimgange.

Dr Alexios het vo 1088 bis 1091 gege d Petschenege, wo über d Donau cho si, kämpft und si schliesslig gschlaage. Gege d Seldschuke het er im Oobeland Understützig gsuecht. Mä het em aber käini Söldner gschickt, sondern dr Babst Urban II. het am 27. Novämber 1095 z Clermont-Ferrand zum Chrüzzuug ufgrüeft. Wo d Chrüzfaarer 1096 im Byzantinische Riich aachoo si, het das im Alexios eender Angst as Fröid gmacht. Er het iiri Fürste dr Lehnseid lo schwööre für d Länder, wo si vo de Moslem wurde eroobere. S Verheltnis zwüsche de Byzantiner und de Latiiner isch aber schwiirig bliibe und d Komflikt häi sich no di no no verscherft. Wo dr Bohemund 1107–1108 wider in s Riich iigfalle isch, het er das abgweert und mit im dr Verdraag vo Devol abgschlosse. Dr Alexios isch bald druf am 15. August 1118 gstorbe.

Litratuur

• Friedrich Wilhelm Bautz: Alexios I. (Byzanz). In: Biographisch-Bibliographisches Kirchenlexikon (BBKL). Band 1, Hamm 1975, Sp. 112-113.
• Ralph-Johannes Lilie: Byzanz – Das zweite Rom. Berlin 2003, S. 328ff.

Weblingg

 Commons: Alexios I Komnenos – Sammlig vo Multimediadateie

• Anna Komnena: The Alexiad. Übersetzt vo dr Elizabeth A. Dawes, 1928; wichdigi Kwelle über s Lääbe vom Alexios

Fuessnoote

Vorgänger Nikephoros III.

Kaiser vo Byzanz 1081–1118

Nochfolger Johannes II.