Alts Ägypte

Under em Alte Ägypte verstoot mer s historische Ägypte vo de Vorgschicht bis zu de Römerzit. D Egypter sälber häi iirem Land Kemet gsäit, was übersetzt „Schwarzes Land“ bedütet. Dä Naame chunnt vom schwarze Schlamm, wo dr Nil noch dr jöörlige Schwemmi zruggloo het und won e fruchtbari Ärnt garantiert het. En anderi Bezäichnig für s Land, wo im Alterdums brucht worden isch, isch „Ta meri“ (T3 mrj) gsi, was gliebts Land bedütet.

Charte vom Alte Egypte und Kusch (im hütige Sudan)

Gschicht

Die egyptischi Gschicht umfasst d Periode vo dr Früezit bis zur Eroberig dur s Römische Riich oder alternativ bis zur Eroberig dur d Araber.

Die egyptischi Kultur isch in färne Urzite entstande, d Hochkultur het in dr Früedynastische Periode aagfange, wo in Oberegypte en ersts Riich entstande isch. Das het sich milidäärisch in dr Richdig vom Nildelta vergröösseret, bis es ganz Unteregypte erooberet het und sich die bäide Däil zum Egyptische Riich veräinigt häi.

Verschidnige Periode werded underschide:

• di Prädynastischi Zit (bis öppe 3150 v. Chr.)
• di Früedynastischi Zit 1.-2. Dynastii (3150-2700 v. Chr.)
• s Alti Riich: 3.-6. Dynastii (2700-2200 v. Chr)
• di Ersti Zwüschezit: 7.-10. Dynastii (2200-2020 v. Chr.)
• s Mittleri Riich: 11.-12. Dynastii (2020-1790 v. Chr.)
• di Zwaiti Zwüschezit: 13.-17- Dynastii (1790-1570 v. Chr.)
• s Noie Riich: 18.-20. Dynastii (1570-1070 v. Chr.)
• di Dritti Zwüschezit: 21.-25. Dynastii (1070-664 v. Chr.)
• d Spootziit: 26.-31. Dynastii (664-332 v. Chr.)
• di Griechisch-römischi Zit (ab 332 v. Chr.)