Dr Andlauerhoof z Arlese

Dä Artikel behandlet dr Andlauerhoof z Arlese. Für anderi Geböid mit em Naame Andlauerhoof lueg doo.

Koordinate: 47° 29′ 36,7″ N, 7° 37′ 22,4″ O; CH1903: 613886 / 260325

Dr Arleshäimer Andlauerhoof
Dialäkt: Baseldütsch

Dr Andlauerhoof z Arlese isch e historische Herschaftssitz und lit am Andlauerwääg 15. Er zellt zu de Baaselbieter Kulturgüeter, won e nazionali Bedütig häi.

Baugschicht ändere

Am Blatz vom spöötere Andlauerhoof isch emol dr Arleshäimer Dinghof gstande, wo gege s Ändi vom 16. Joorhundert an dr bischöflig Hoofmäister Johann Wilhelm Reutner vo Wyyl gange isch, und dä het en 1616 nöi baut. In dr zwäite Helfti vom 17. Joorhundert isch s Geböid im Bsitz vo dr Familie vo Roggebach gsi. 1743 het s dr Domdekan Beat Anton Münch vo Münchestäi kauft und komplett umbaut. Dr Emanuel Büchel het en denn abzäichnet.

1759 het dr Herr vo Goullon dr Hoof kauft und scho 1762/63 an dr Landvogt Franz Carl vo Andlau witerverkauft und dä het en zu sim Landvogteisitz gmacht. Vo denn aa het er «Andlauerhoof» ghäisse. Dr vo Andlau het e Bavillion uf dr Südsite vom Hoof baut und si Frau het zämme mit em Domherr Heinrich vo Ligertz d Gaardeaalaag aagläit, wo hüte d «Ermitaasch» häisst. Iire Soon, dr Freiherr Conrad vo Andlau, isch Generalguwernöör vo de Allierte worde und het vom Andlauerhoof us s Fürstbistum Baasel verwaltet, bis dass es am 20. Merz 1815 ufglööst worde isch. Er het dr Hoof im Stil vom Ampiir umbaut, und nöiji Ställ, e groossi Schüüre und woorschinlig d Remiise nääbedra baut.

Si Soon Franz vo Andlau het 1844 die ganz Liigeschaft de bäide Baasler Spekulante Achilles Bischoff und Johann Jakob Bachofe-Meriaa verkauft. Die häi s im Vicomte Théodore Renouard de Bussière us Stroossburg witerverkauft und vo iim het 1846 d Gmäind e groosse Däil vom Bsitz übernoo, s Guet sälber het dr Johann Siegmund Alioth-Hornung kauft. Vo denn aa häi Familiemitgliider vo de Alioths im Andlauerhoof gläbt und in witer usbaut.

Kwelle ändere