Alemannische Wikipedia

Armin Laschet

ditsche Bolitiker

Dr Armin Laschet (* 18. Februar 1961 z Aachen) isch e dytsche Bolitiker (CDU) un syt Oktober 2021 Mitglid vum Dytsche Bundesdag. Vum 27. Juni 2017 bis zum 26. Oktober 2021 isch er dr elft Minischterbresidänt vum Land Nordrhy-Weschtfale gsii. Am 16. Jänner 2021 isch er zum Barteivorsitzer vu dr CDU gwehlt wore.

dr Armin Laschet (2021) Unterschrift vum Armin Laschet

Lääbe ändere

Familie, Uusbildig un Beruef ändere

Dr Laschet isch mit drei jingere Brieder in ere remisch-kadolische Familie im Aachener Stadtdail Burtscheid ufgwagse. Sy Mueter isch d Huusfrau Marcella Laschet (geb. Frings 1933–2013) gsii,[1] sy Vater Heinrich (Heinz) Laschet (* 1934) isch Styger uf dr Gruebe Anna z Alsdorf gsii un isch noch ere pedagogische Umschuelig Laiter vun ere Aachener Grundschuel. D Familie Laschet stammt us em dytschsprochige Dail vu Wallonie; sy Großvater Hubert Laschet (1899–1984) isch in dr 1920er Johr vu Hergenrath, eme Dorf im Norde vu dr Dytschsprochige Gmainschaft vu Belgie, uf Aachen-Burtscheid zoge; sy Großmueter Hubertina Laschet geb. Wetzels (1900–1979) isch z Aachen as Dochter vu Eltere uf d Wält chuu, wu grad erscht vu Welkenraedt z Belgie dertaane zoge gsi isch.[2]

In syre Juged het si dr Laschet in dr kadolische Jugedarbet vu St. Michael z Burtscheid engaschiert. No sym Abitur 1981 am Bischeflige Pius-Gimnasium Aachen het er Rächts- un Staatswisseschaft z Minche un z Bonn studiert un het anne 1987 s erscht juristisch Staatsexamen abglait. Sy Hochschueluusbildig isch dur e Stipendium vu dr Konrad-Adenauer-Stiftig gferderet wore.[3] In syre Studiezyt isch er Mitglid vu dr kadolische Studänteverbindige KDStV Aenania München un KDStV Ripuaria Bonn wore, boodi im CV.

Vu 1987 bis 1988 het dr Laschet e schurnalistisch Volontariat bim Radiosänder 95.5 Charivari gmacht un het derno bis 1994 as freie Schurnalischt fir s Bayerisch Fäärnseh un bayerischi Rundfunksänder gschafft un as wisseschaftlige Beroter vu dr domolige Bresidänti vum Dytsche Bundesdag, Rita Süssmuth. Vu 1991 bis 1994 isch er Schefredakte vu dr KirchenZeitung Aachen gsii.[4] Zwische 1995 un 1999 isch er Verlagslaiter vum kadolische Einhard-Verlag gsii.[5]

Bolitik ändere

 
dr Laschet uf em 31. Barteidag vu dr CDU z Hamburg (2018)

Barlemäntarier ändere

Anne 1989 isch dr Laschet, wu 1979 mit 18 Johr in d CDU yydrätte gsii isch, as sällemol jingschte Rotsherr fir d CDU in dr Aachener Stadtrot yyzoge, wun er bis 2004 Mitglid gsii isch.

Bi dr Bundesdagswahl 1994 het er s Diräktmandat fir dr Wahlkrais Aachen-Stadt gwunne, het s aber no vier Johr bi dr Bundesdagswahl 1998 wider verlore.

1999 isch er zum Mitglid vum Europäische Barlemänt gwehlt wore. Är isch bis 2005 Mitglid blibe un het si vor allem in dr Usse- un Sicherhaitsbolitik, dr internationale Zämenarbet un dr Huushaltsbolitik engaschiert.[5]

Landesminischter z Nordrhy-Weschtfale ändere

Am 24. Juni 2005 isch dr Laschet im Kabinett vum Jürgen Rüttgers zum Landesminischter fir s nei zuegschnitte ne Minischterium fir Generatione, Familie, Fraue un Integration vum Land Nordrhy-Weschtfale wore. Dr Laschet isch dr erscht Landesminischter fir Integration z Dytschland gsii.[6][7] Ab 8. Merz 2010 het er kummissarisch au d Gschäft vum Minischter fir Bundesaaglägehaite, Europa un Medie ibernuu. Sy Amtszyt het ufghert mit dr Ibernahm vu dr Regierisverantwortig dur di rot-grien Minderhaitsregierig unter dr Hannelore Kraft am 14. Juli 2010.[8]

Vu 2005 bis 2010 isch er as Landesminischter stellverdrättend Mitglid vum Bundesrot gsii, syter 2017 isch er wider Mitglid vum Bundesrot.

Vorsitzer vum CDU-Landesverband NRW ändere

Anne 2010 het dr Laschet noch em Ruggzug vum Jürgen Rüttgers no dr Landdagswahl 2010 fir s Amt vum Vorsitzer vum CDU-Landesverband Nordrhy-Weschtfale kandidiert. D CDU NRW het iri Mitglid gfrogt, eb dr Norbert Röttgen oder dr Laschet neie Vorsitzer soll gee, d Mitglider hän fir dr Röttgne gstimmt.[9] Wu dr Norbert Röttgen d Landdagswahl 2012 verlore ghaa het un derno zrugdrätten isch, isch dr Laschet bim CDU-Sunderbarteidag am 30. Juni 2012 mit 77 % vu dr Delegiertestimme zum neie Vorsitzer vu dr CDU Nordrhy-Weschtfale gwehlt wore.[10]

Landdagsabgordnete z Nordrhy-Weschtfale ändere

Bi dr Landdagswahl z Nordrhy-Weschtfale am 9. Mai 2010 isch er zum erschte Mol in Landdag vu Nordrhy-Weschtfale gwehlt wore.[11] Bi dr vorzogene Landdagswahl am 13. Mai 2012 isch dr Laschet iber d Landeslischt wider in Landdag yyzoge. Am 18. Dezämber 2013 isch dr Laschet mit 64 Stimme zum neie Vorsitzer vu dr CDU-Landdagsfraktion gwehlt wore un dodermit zum Oppositionsfierer im Landdag.

Bi dr Landdagswahl am 14. Mai 2017 isch er im Landdgswahlkras Aachen II as Diräktkandidat in Landdag gwehlt wore.[11]

Minischterbresidänt vu Nordrhy-Weschtfale ändere

Dr Laschet isch am 27. Juni 2017 mit dr Stimme vun ere schwarz-geele Koalition vu CDU un FDP im erschte Wahlgang mit em absolute Meh vu 100 Stimme (bi insgsamt 199 Abgordnete) im Landdag zum elfte Minischterbresidänt vum Land Nordrhy-Weschtfale gwehlt wore un het syterhär d Landesregierig gfiert. Wel er im Septämber 2021 in Bundesdag gwehlt woren isch un d Verfassig vu NRW Regierigsmitglider verbietet, ass si glychzytig Mitglid vum Bundestag sin, het dr Laschet sy Amt am 25. Oktober 2021 vor dr konschtituierende Sitzig vum 20. Dytsche Bundesdag am 25. Oktober 2021 niderglait.

Bundesbartei ändere

2008 isch er in CDU-Bundesvorstand gwehlt wore un isch ab 2012 ain vu fimf stellverdrättende Vorsitzer*ne vu dr CDU gsii.[5]

Wu am 10. Februar 2020 d Annegret Kramp-Karrenbauer aagchindet het, ass si im Lauf vum Johr 2020 dr CDU-Barteivorsitz niderlege un nit as Chanzlerkandidati bi dr Bundesdagswahl 2021 aadrätte wett, het dr Laschet am 25. Februar 2020 verchindet, ass er fir s Amt vum CDU-Bundesvorsitzer kandidiere duet mit em Jens Spahn als Vizevorsitzer.[12] ÄR isch rdodermit gege dr Friedrich Merz[13] un dr Norbert Röttgen aadrätte.[14] Wäg dr COVID-19-Pandemy isch d Wahl verschobe wore, schließlig isch uf em digital durgfierte Barteidag vu dr CDU im Jänner 2021 dr Laschet gwehlt wore.

Am 11. April 2021 het er, wie au d Markus Söder, verchindet, ass er as Chanzlerkandidat fir d Union bi dr Bundesdagswahl wett adrätte.[15] Am 20. April 2021 het dr Söder syni Kandidatur zruggzoge, dodermit isch dr Wäg fir dr Laschet frei gsii.[16]

Mitglid vum Dytsche Bundesdag (ab 2021) ändere

Bi dr Bundesdagswahl 2021 isch dr Armin Laschet iber di nordrhy-weschtfälisch Landeslischt vu dr CDU in Bundesdag yyzoge.

Schrifte ändere

Literatur ändere

  • Tobias Blasius, Moritz Küpper: Der Machtmenschliche. Armin Laschet. Die Biografie. Klartext, Essen 2020, ISBN 978-3-8375-2335-5.

Dokumentarfilm ändere

  • Kraft gegen Laschet – Hier und heute, WDR Fernsehen
  • Konfrontation: Markus Feldenkirchen trifft Armin Laschet, WDR Fernsehen

Weblink ändere

  Commons: Armin Laschet – Sammlig vo Multimediadateie

Fueßnote ändere

  1. ↑ Duell in NRW: Kraft gegen Laschet. In: RP Online. 14. Mai 2017, abgruefen am 12. Juli 2018.
  2. ↑ Bernhard Willems, "Die früheren Grundherren des Bereiches von Eupen", Ostbelgische Chronik, Band. 2, 1949
  3. ↑ Stefan Marx: Armin Laschet - Geschichte der CDU, Konrad-Adenauer-Stiftung, abgerufen am 13. Januar 2021
  4. ↑ Annette Zoch, Matthias Drobinski Auf der falschen Seite, Süddeutsche Zeitung 13. November 2020, S. 6
  5. ↑ 5,0 5,1 5,2 Armin Laschet – Das Landesportal. uf land.nrw
  6. ↑ Katharina Schuler: Armin Laschet: Der nette Ausländerversteher wird streng. In: Zeit Online. 10. Mai 2017, abgruefen am 1. Juni 2017.
  7. ↑ Der Aufstieg des netten Herrn Laschet. Abgruefen am 10. Januar 2021.
  8. ↑ Armin Laschet, der rheinische Kämpfer. 9. Mai 2017.
  9. ↑ Norbert Röttgen wird neuer Chef der NRW-CDU. Die Welt, 31. Oktober 2010, abgruefen am 5. Juli 2013.
  10. ↑ Tobias Blasius: Armin Laschet als Vorsitzender der NRW-CDU wiedergewählt. 26. April 2014.
  11. ↑ 11,0 11,1 NRW-Landtagswahl: 567 Stimmen trennten Laschet von der ersten Niederlage, rp-online.de, 15. Mai. 2017.
  12. ↑ Markus Wehner, Johannes Leithäuser: Wie Laschet und Spahn ihre Mitbewerber unter Druck setzen. In: Frankfurter Allgemeine Zeitung. 24. Februar 2020, abgruefen am 24. Februar 2020.
  13. ↑ „Ich spiele auf Sieg und nicht auf Platz“. In: Frankfurter Allgemeine Zeitung. 25. Februar 2020, abgruefen am 25. Februar 2020.
  14. ↑ „Es geht um die Zukunft der CDU“. In: Frankfurter Allgemeine Zeitung. 18. Februar 2020, abgruefen am 25. Februar 2020.
  15. ↑ Laschet und Söder beide bereit zu Kanzlerkandidatur. In: tagesschau.de. Abgruefen am 11. April 2021.
  16. ↑ Söder zieht zurück, Laschet kann Kanzlerkandidat werden, Süddeutsche, 20. April 2021
Vun "https://als.wikipedia.org/w/index.php?title=Armin_Laschet&oldid=1037198"