D Art Basel giltet as di wältwyt wichtigscht Kunschtmäss. Si findet alljohr im Friesummer z Basel statt. Syt 2002 git s as amerikanische Ableger d Art Basel Miami Beach aafangs Dezämber z Miami Beach, Florida, USA. 2013 isch mit dr Art Basel in Hong Kong e witere Standort in Südostasie drzuechoo.[1]

S ArtBasel Gspängsterauti 2011
Dialäkt: Baseldütsch

Gschicht ändere

D Idee, e Mäss fir Kunscht z Basel z veraastalte, isch anne 1968 ufchuu. D Initiative isch vu dr Galerischtin un Kunsthändlere Trudl Bruckner, Balz Hilt un Ernst un Hildy Beyeler uusgange. Au dr Ernst Barmettler vu dr domolige Muschtermäss Basel isch derby gsii. S Projäkt isch di diräkt Reaktion uf di erscht Mäss fir moderni un zytgnessischi Kunscht z Köln gsii, em Kölner Kunschtmärt im Spotjohr 1967. Dää Kunschtmärt het dr Verein progressiver deutscher Kunsthändler veraastaltet. As „uudemokratisch“ isch dertemol kritisiert wore, ass dr Verain nume uusgwehlti Galerie zue dr Mäss yyglade het. D Basler Kunschthändler hän sich wäge däm fir e uffig Mässkunzäpt entschide, wu Uussteller ohni Dailnahmebschränkig zuegloo het.

Di erscht Mäss z Basel het vum 11. bis 16. Juni 1970 stattgfunde. 90 Galerischte hän mitgmacht, s sin 10.300 Bsuecher chuu. Mit eme Umsatz vu 5,8 Millione Franken isch d Veraastaltig au kommerziäll e Erfolg wore. Wel d Kölner Kunschthändler ihr Mässkunzäpt gfehrdet gsähne hän, hän si zum Boykott vu dr Basler Veraastaltig ufgruefe. D Galerischte hääte sich entschaide solle, eb si z Köln derby sin oder z Basel. Ainewäg het sich d Art Basel im Kunschtbedrib chenne fescht etabliere.

Syt 1973 findet d Mäss in dr dänkmolgschitzte Rundhofhalle statt. E Uusstellerbyyrot (Art Committee) wirkt syt 1974 bi dr Vorberaitig mit un drifft e Uuswahl unter dr aagmäldete Galerie.

Bi dr 39. Messe vum 4. bis 8. Juni 2008 sin iber 300 Galerie us 33 Länder derby gsii. Si sin vum Art Committee us iber 1000 Bewärbige uusgwehlt wore un hän rund 5.000 Wärch bresäntiert vu iber 2.000 Kinschtler vum 20. un 21. Johrhundert. Am sterkschte verdrätte sin mit 72 Galerie d USA gsii, derno Dytschland (49 Galerie), d Schwyz (35), Grossbritannie (29) un Frankrych (22). Rund 60.000 Kunschtliebhaber, Galerischte, Händler, Sammler un Kunschtschaffendi hän d Mäss bsuecht.[2] S 40-jehrig Jubiläum het d Art Basel vum 10. bis 14. Juni 2009 gfyyrt.

Wäge ihre inernationale Bedytig isch d Art Basel anne 2004 vu dr Londoner Zytig The Daily Telegraph „Olympiade vu dr Kunschtwält“ gnännt wore.[3]

Weblink ändere

Fueßnote ändere

  1. MCH Swiss Exhibition (Basel) Ltd. - About Art Basel / Our History. Website vo dr Art Basel. Abgrüeft am 7. August 2013.
  2. 60.000 Besucher, 205 Privatflugzeuge (Memento vom 3. Augschte 2008 im Internet Archive) news.ORF.at, 15. Juni 2008
  3. The Olympics of the Art World The Daily Telegraph, 24. Juni 2004.
  Dä Artikel basiert uff ere fräie Übersetzig vum Artikel „Art_Basel“ vu de dütsche Wikipedia. E Liste vu de Autore un Versione isch do z finde.