Hauptmenü ufmache
Dr Iigang zur Halle 2
Dialäkt: Baseldütsch
S alte Symbol vo dr Mäss Basel

D Mustermäss Basel (churz «muba») isch e jöhrligi Mäss-Veraastaltig in dr Schwizer Stadt Basel. In dr Umgangssprooch säit mä hüfig em au em Mässgländ esoo, au wenn dört au anderi Mässe as d «muba» stattfinde (z. B. Baselworld). An dr Glasfassade vo dr Halle 2 hets e groossi Uhr, wo zum Wohrzäiche vo dr Mäss worden isch (e gliichi Uhr befindet sich im Chraftwärk Birsfälde). Sit 2003 stoht am Mässblatz dr Mässdurm, wo mä scho vo witem cha gseh und won esoo zum zwäite Wohrzäiche vo dr Mäss worden isch.

D «muba» beläit hützudags alli drei Stöck vo dr Halle 2 und dr ersti Stock vo dr Halle 1. Jedes Joor zieht si über 300'000 Bsuecher aa us dr Schwiz, us Süddütschland und Frankriich und isch immer no die grössti Publikumsmäss in dr Schwiz.

S Mässgländ vo dr Mäss Basel bietet uf fümf Halle, wo rund um e Mässblatz verdäilt si, en Usstelligsflechi vo 132'000 m², e Kongrässzentrum mit 16 Kongräss- und Komferänzrüüm, e Musical Theater mit 1500 Sitzblätz und e Parkhuus mit 1600 Blätz.

AllgemäinsBearbeite

As Waremäss git d Mustermäss de Usteller d Möglikäit, Nöjigkäite us verschidnige Beriich vom Detailhandel vorzstelle. D «muba» findet jedes Joor im Früehlig statt. Am Eröffnigsdaag chönne alli Lüt, won e Blaggedde vo dr Basler Fasnacht kauft ha, gratis iine.

Sehr beliebt isch früehner d «Länder»-Abdäilig gsi, wo sich verschidigi Länder us dr ganze Wält häi chönne bresentiere. Uf dr äinte Site si dört dradizionelli, uf dr andere Site aber au innovativi Ware vorgstellt und verchauft worde. Bi jeder Mäss het s e «Gastland» gee, wo dütlig meh Usstelligsflechi überchoo het as die andere. Sit Aafang 2000 git s die «Länder»-Abdäilig in dere Form aber nüme. S «Gastland» isch aber immer no e wichdige Bestanddäil vo dr muba. Im Johr 2011 isch Egypte an dr «muba» verdräte gsi.

Am Aafang vo dr 1990er Joor het in dr Mäss Basel d Kompiutermäss Orbit stattgfunde; spööter isch si uf Züri verleit worde.

GschichtBearbeite

1916 het dr Basler Regierigsroot beschlosse, z Basel e Mustermäss z organisiere und im Joor druf het die ersti Mustermäss stattgfunde. 1920 isch d Gnosseschaft Schweizer Mustermesse gründet worde und 1926 si die erste definitive Mässehallene uf em hütige Mässgländ eröffnet worde. Noch em Zwäite Wältchrieg isch d Mäss erwiteret worde: 1953 het mä aagfange, die zwäiti Mässhalle baue und 1965 isch d Halle 3 fertig worde. 1973 isch die ersti Uhre- und Schmuckmäss organisiert worde, wo hüte under em Naame Baselworld bekannt isch. 1984 isch s Kongrässzentrum Basel eröffnet worde. 1998/99 isch d Halle 1 nöj baut worde. Denn het d muba sich noch Partner afo umluege und 2001 het si sich mit dr Mäss Züüri zur MCH Messe Schweiz AG zämmegschlosse und 2009 häi si dr Name zu MCH Group AG gänderet.

S RundhoofgeböidBearbeite

D Halle 2, s Rundhoofgeböid, isch 1954 vom Archidekt Hans Hofmann baut worde und zelt hüte zu de dänggmolgschützte Baasler Kulturgüeter, wo nazionali Bedütig häi.

WeblinggBearbeite

47.5651638888897.6012944444444Koordinate 47° 33′ 55″ N, 7° 36′ 5″ O; CH1903: 612242 / 268286

  Dä Artikel basiert uff ere fräie Übersetzig vum Artikel „Mustermesse_Basel“ vu de dütsche Wikipedia.

E Liste vu de Autore un Versione isch do z finde.