S Rundhoofgeböid vo dr Schwizerische Mustermäss

47.5651638888897.6012944444444

Dialäkt: Baseldütsch

S Rundhoofgeböid vo dr Schwizerische Mustermäss vom Mässdurm us gsee

Dr Iigang zur Halle 2

S Rundhoofgeböid vo dr Schwizerische Mustermäss isch en Ustelligshalle uf em Gländ vo dr Schwizerische Mustermäss am Mässblatz 9 z Baasel. Es zelt as Baasler Kulturguet, wo nazionali Bedütig het.

S Geböid isch 1954 vom Archidekt Hans Hofmann, wo au dr Archidekt vo dr Landi z Züri gsi isch, baut worde. Es isch e tüpischs Bauwärk us de 1950er Joor vo hoocher Kwalideet und het sich mit sinere markante Uur über em Iigang zum e Baasler Woorzäiche entwigglet.

D Däil vom Bau sin klaari geometrischi Körper, wo uf Kwadrat, Kräis und Rächtegg ufbaut si. Es isch e Zwäckgeböid us Staal, Beton, Bachstäi und Glaas. D Farbgääbig isch bregnant und understützt die funkzionali Ornig.

1992 isch s Geböid vo Fierz Architekten renowiert worde.

Weblink

 Commons: Rundhofgebäude der Schweizerischen Mustermesse – Sammlig vo Multimediadateie