Baloise Park

47.548897897.59231253

Dialäkt: Baseldütsch

S Ansambel

Dr Baloise Park isch en Areal z Baasel mit drei Geböid, wo d Versicherigsgrubbe Bâloise iire Sitz het. Zwüschen em Aeschegraabe, em Parkwääg und dr Nauestrooss, nördlig vom Baanhoof Baasel SBB zwüsche dr Elisabethenaalaag und em BIZ-Durm, gits en offeni Aarbets- und Beweagigszoone für d Mitarbäiter vo dr Bâloise, Drittmieter und d Bevölkerig. Im Baloise Park hets 1300 Büroaarbetsblätz, vo dene brucht d Bâloise sälber öbbe 700. Dr Räst wird vermietet. Im Novämber 2015 si d Geböid, wo vorane dert gstande sin, drunder d Verwaltigsgeböid vo de Baasler Versichrige und s ehemoolige Hotel Hilton Baasel, abgrisse worde. Am 15. Juni 2017 isch dr Grundstäi für s erste nöije Geböid im Baloise Park gläit und am 21. Septämber 2020 isch dr Park eröffnet worde.

S Usbildigszentrum

S Usbildigszentrum

Im 42 Meter hooche Bauwärk vom Valerio Olgiati, wo im Baufäld Ost e Bruttostockflechi vo 13'000 Kwadratmeter het, isch s Usbildigszentrum vo dr Versicherigsgrubbe.

S Baloise Hoochhuus

S höggste Bauwärk im Baloise Park isch s Baloise Hoochhuus im Weste, wo 89 Meter hooch isch. Es isch vo de Schwizer Archidekte Miller & Maranta entworfe worde. Es stoot am Aeschegraaben und wird zum grösste Däil as Hotel gnutzt.

Dr Hauptsitz

En achtstöckigs Geböid mit ere Hööchi vo 34 Meter vo Diener & Diener im Baufäld Süüd dient as Hauptsitz vo dr Bâloise Versicherig.

Litratuur

• Bâloise (Uusegääber): Building the Baloise Park. Diener & Diener - August + Margrith Künzel - Miller & Maranta - Valerio Olgiati - Thomas Schütte - Matteo Thun. Christof Meriaa Verlaag, Baasel 2020, ISBN 978-3-85616-928-2

Weblingg

• Die offizielli Website zum Baloise Park
• TagesWoche: «Baloise Park» setzt ein markantes städtebauliches Zeichen, Artikel vom 26. Novämber 2014
• Webcam zum Bauprojekt am Baloise Park

Fuessnoote

Dä Artikel basiert uff ere fräie Übersetzig vum Artikel „Baloise_Park“ vu de dütsche Wikipedia. E Liste vu de Autore un Versione isch do z finde.