Hauptmenü ufmache
Violinschlüssel us ere Vorstellig vom Basel Tattoo 2012
Dialäkt: Baseldütsch

S Basel Tattoo isch e Tattoo-Show, wo sit 2006 jedes Johr im Juli in dr Schwiizer Stadt Basel stattfindet. Inhaltlig isch si em Edinburgh Military Tattoo ähnlig und isch noch em Edinburgh Tattoo die zweitgrösst Tattoo-Verastaltig wältwiit.

Gschicht und FormBearbeite

S Basler Top Secret Drum Corps het 2006 s erste Freiluft-Tattoo organisiert, wo s Corps s Johr vorhär am Edinburgh Military Tattoo grossi Erfolg het chönne fiire. Vorhär het s 2004 und 2005 s ‹Yshalle Tattoo› as Halleverastaltig in der Basler Iissportarena St. Jakob gee. As ‹Open Air Tattoo› isch s Basel Tattoo einzigartig in dr Schwiiz.

S Basel Tattoo findet im Hof vo dr Kaserne Basel im Glaibasel statt. D Verastaltig wird jedes Johr vo guet 100.000 Zueschauer bsuecht und isch sit 2008 scho Mönet vorus usverchauft. Dr Spiilort, dr Innehof vo dr historische Kasärne am Rhii, git em Alass e Rahme, wo spürbar authentisch isch.

Sit 2008 findet d Tattoo Street statt, e Parade dur d Basler Altstadt vom Münsterplatz zum Kulturzentrum Kasärne Basel.

S Programm wächslet jedes Johr und wird vo internationale Kapälle, Bands und Tanzformationen bestritte. Bestanddeil vom Programm si d Ufdritt vo de ‹Massed Pipes and Drums›.

S Basel Tattoo wird vo 7 Vollzit- und 4 Deilzitarbetschreft währed am ganze Johr organisiert. Dr Produzänt vo dr Verastaltig isch dr Erik Julliard. Für dass alles ohni Broblem ablauft git s öbbe 320 freiwilligi Hälferinne und Hälfer.

EtymologiiBearbeite

Dr militärisch Begriff tattoo leitet sich vom holländischen Usdruck «Doe den tap toe» ab, was sovil wie «mach dr Zapfhahne zue» bedütet. Dä Ruef het im 17. und 18. Johrhundert z Holland die militärischi Nachtrueh iigleitet. Dr militärisch Usdruck tattoo het aso nüt mit em Begriff tattoo für Tetowierig z due, wo gliich gschriibe wird.

S änglische Wort tattoo het in sinere militärische Verwändig die gliichi Doppelbedütig wie s dütsche Wort Zapfestreich. Ursprünglig het tattoo usschliesslig dr Zitpunkt bezeichnet, wo d Nachtrueh in ere Garnison oder Kasärne agfange het. Wil dä Zitpunkt hüfig mit eme Trompetesignal bekannt gmacht worden isch, het sich d Bedütig vom Begriff über d Johrhundert erwiiteret. Zur ursprünglige Bedütig Nachtrueh isch die zweiti Bedütig cho: s Spiile vo Militärmusik.

LinggBearbeite

  Dä Artikel basiert uff ere fräie Übersetzig vu dere Version vum Artikel „Basel_Tattoo“ vu de dütsche Wikipedia.

E Liste vu de Autore un Versione isch do z finde.