Hauptmenü ufmache

Baasler Inträssegmainschaft Dialäggt

en Verain, wo sich för Dialäkt iisetzt

D Baasler Inträssegmainschaft Dialäggt (offiziell hochdütsch Basler Interessengemeinschaft Dialekt) isch e Verein vo Basel, wo sech für d Mundart tuet ysetze. Er isch am 22. April 2008 gründet worde.

Er isch anne 2011 aktyv worde, wo z Basel es politischs Projäkt vorgleit worden isch zum dr Tieläkt im Alltag vo de Schuele und konkret sogar au im Chindergarte lo z verschwinde. Sider luegt dr Verein psunders drfüür, ass me d Chinder au i de Schuelhüüser wo’s goot ganz eifach loot lo i dr Mundart schwätze.

D Gselschaft organisiert aller Gaddig Aaläss rund um d Mundartkultur, mit Mundartmusig, Slam Poetry, Vortreeg vo Dialäktoloogen und no meh Sache. Si understützt s Theater Baseldytsche Bihni im Lohnhof z Basel. Und si pflägt dr Kontakt zu anderne Mundartorganisazioone wie öppe dr Basler Hebelstiftig,[1] em Verein Schweizerdeutsch, wo nöi als mundartforum.ch uftritt, und dr Muettersproch-Gsellschaft und em Elsässisch-Verein E Friehjohr fer unseri Sproch.

D IG Dialäggt erinneret draa, ass d Arbet für d Mundart guet isch zum die kulturelli Eigeständikeit von ere Regioon z erhalte, und das sig als algemein kulturells und sozials Projäkt nid e Froog vo dr Parteipolitik, sondern e Sach wo alli öpis agoot. Drum definiert sech d IG als en überparteilichi Organisazioon.

Das was d Basler IG wott, isch aber glychzytig es kulturells und es politischs Aalige: Me sell ufhööre, die läbigi Mundart gäge d Pflääg von ere Standardsprooch uszspile, so wie’s d Schuelbehörde sit ere Zyyt i teil Kantöön probiere z mache. Es heig sech jo zeigt, ass d Chinder gar keis Probleem drmit händ, je nach Situazioon der lokal Tieläkt oder en ofizielli Hochsprooch z schwätze und beides näbenand richtig z leere. Und das gälti au für d Chinder vo Familene, wo us em Ussland i d Schwiiz ygwanderet sind, wie me vo sorgfältigen Umfrooge weiss.[2] D Gselschaft het s nöie Leerspiili „Sproochschatz“ lo usschaffe, wo me im Chindsgi dr Tieläkt drmit chan üebe.

D Basler IG Dialäggt, wo vo de Kopresidänte Vreni Leibundgut, Liselotte Reber-Liebrich und Felix Rudolf von Rohr gleitet wird, het en eigeti Website: igdialekt.ch.

WeblinkBearbeite

FuessnooteBearbeite