Basler Münsterschatz

Dr Basler Münsterschatz isch dr Chilleschatz vom Basler Münster in dr Schwiz, wo in über 500 Joor entstande isch. Basel isch im Middelalter dr Sitz vom Bischof vo Basel gsi und s Münster isch d Hauptchille vom Bistum gsi, und het en ussergwöönlige und riiche Schatz besässe.

S „Heinrichschrüz“ us em Basler Münsterschatz, Kunstgwärbmuseum Berlin

Dialäkt: Baseldütsch

D Gschicht vom Schatz

Objekt us de erste Joorhundert vom Münster si nid erhalte. Dr Schatz goot zrugg uf d Zit vom Heinrich II. im 11. Joorhundert, wo dr Bau vom zwäite Basler Münster, em Adalberto- oder Heinrichsmünster, gförderet het. In de fümf Joorhundert druf isch s Ensemble vo Relikwiar, Monstranze und Chrüz stark gwaggse. Es isch erstuunlig, ass dä Chilleschatz d Zerstöörigswuet vom Bildersturm vo 1529 umbeschäädigt überstande het. Denn isch er öbbe 300 Joor lang in dr Sakristei vom Münster ufbewaart worde.

Erst d Drennig vom Kanton Basel in d Halbkantöön Basel-Stadt und Basel-Landschaft im Joor 1833 het en usenandergrisse. Am 25. Novämber 1833 het s Schiidsgricht vo dr äidgenössische Daagsatzig beschlosse, ass dr Chilleschatz im Verheltnis 36 Brozänt (Basel-Stadt) zu 64 Brozänt (Basel-Landschaft) sött ufdäilt wärde. Wil Basel-Landschaft dringend Gäld brucht het, isch si Däil vom Schatz im Joor 1836 verstäigeret und eso in dr ganze Wält verströit worde. Hüte si e Hufe vo deene wärtvolle Relikwiar und liturgische Gräät in Sammlige in verschiidene Museum wie em Bayrische Nazionaalmuseum z Münche, em Kunstgwärbmuseum z Berlin, em British Museum z London, em Rijksmuseum z Amsterdam, em Metropolitan Museum of Art z Nöi York, em Victoria and Albert Museum z London und em Musée national du Moyen Âge z Bariis.

D Stück, wo d Stadt Basel bhalte het, si im Historische Museum Basel usgstellt.

D Ustellig vom gsammlete Schatz im Joor 2001

2001 het z Basel en Usstellig vom Chilleschatz stattgfunde, wo alli Objekt us de verschiidene Museum, wo no erhalte gsi si und wo mä het chönne dransbordiere, zämme usgstellt worde si. D Ustellig isch au im Nöi Yorker Metropolitan Museum und im Bayrische Nazionalmuseum z Münche zäigt worde.

Weblingg

 Commons: Basler Münsterschatz – Sammlig vo Multimediadateie

• Website vom Historische Museum Basel

47.5544717.590474

Dä Artikel basiert uff ere fräie Übersetzig vum Artikel „Basler_Münsterschatz“ vu de dütsche Wikipedia. E Liste vu de Autore un Versione isch do z finde.