Bichtigerhuus

47.5617847.590136

Dialäkt: Baseldütsch

S Bichtigerhuus

S Bichtigerhuus isch e historischs Geböid im Kläibaasel und befindet sich am Klingedaal 15. Es stoot uf dr Liste vo de Baasler Kulturgüeter, wo für d Region vo Bedütig si. Hüte si Arztbraxe und Büro im Huus.

Baugschicht

Ursprunglig isch s «Bichtigerhuus» s Dehäi vo de bäide Biichtvater vo de Nonne im Klooster Klingedaal gsi, wo as Manne nid im Klooster sälber häi döfe woone. Em Biichtvater mit em hööchere Rang het mä au Lääsimäister gsäit und doorum kunnt s Huus au as «im Lääsimäister si Huus» in de Urkunde vor. Wo d Baasler Klööster noch dr Reformazioon ufghoobe worde si, isch dr Schaffner oder "Zinsmäister" dri kho, wo dr Root as Verwalter vo de Geböid vom ehemoolige Klooster iigsetzt het. 1572 häi dr Stäimetz Othmar Gessner, dr Zimmermaa Ulrich Schnell und dr Dischler Claus Schott s Huus, wo denn as «im Zinsmäister si Huus» bekannt gsi isch, nöi baut, und 1629/30 het dr "Wanuetsch, dr Moler" alli Stuube vom «Zinshuus» renowiert. Wo in dr Middi vom 17. Joorhundert d Verwaltig vo alle ehemoolige Kloosterbsitz in d Händ vom Diräktorium vo de Schaffneije gläit worde isch, isch dr Stadtschriiber vo dr Mindere Stadt ins Huus go woone. Sit 1803 isch d Kanzlei vom Appelazionsgricht din gsi. 1840 het s dr Stadtbaumäister Amadeus Merian renowiert und denn isch s e Zitli vermietet worde. Druf isch s zum Kiirche- und Schuelguet khoo und s Pfarrhuus für e Gäistlige vo dr Theodorskiirche worde. Wo Kiirche und Staat z Baasel drennt worde si, isch s Huus im Bsitz vo dr evangelische Kiirche bliibe und die het s im erste Kiircheverwalter, em Louis Bürgin überloo.

Kwelle

• Bichtigerhuus im Klingental uf basler-bauten.ch, abgrüeft am 14. Februar 2015