Dialäkt: Baseldütsch

Dr Amadeus Merian (* 12. Mai 1808 z Baasel, † 11. Januar 1889) isch dr erst Baasler Bauinspäkter gsi.

Biografii ändere

Dr Amadeus Merian isch 1808 as dr Soon vom Zimmermäister Friedrich Merian und dr Margarethe, gebooreni Pfaffenschmied z Baasel uf d Wält choo. Er het z Pforze e Stäihauerleer gmacht und denn an dr Bauakademii z Münche studiert.

Er het sich as Archidekt z Baasel niidergloo und isch vo 1835 bis 1859 dr stedtisch Baumäister gsi. Mit em Brojekt von ere Verbindigsstrooss vom Santiihanns em Rhiiuufer nooch bis zur Rhiibrugg isch er nid duuredrunge. Schliesslig het er demissioniert, wo s wägen em Umbau vo dr Alte Uniwersidäät am Rhiisprung zu Strit cho isch.[1] Au d Restaurazioonsblään für s Dalbedoor, won er zämme mit em Baasler Kunstveräin im Groosse Root vorgläit het, isch vo däm 1871 abgleent worde.[2]

Dr Merian het 1836 an dr Theodorskiirche Renowazionsaarbäite usgfüert, vo 1836 bis 1837 an dr Peterskiirche, 1838 an dr Lienerdskiirche und 1836 bis 1857 am Münster. 1858—1859 het er zämme mit em Christoph Riggenbach d Clarakiirche zum Däil nöi baut. Si erste Nöibau isch 1838-40 s Café Spitz gsi, s Gsellschaftshuus im klassizistische Stiil vo de drei Kläibaasler Eeregsellschafte grad näbe dr Rhiibrugg. Wisawii über em Rhii het er vo 1842 bis 1844 s Hotel Drei König baut.

Schrifte ändere

  • Erinnerungen von Amadeus Merian, Architekt, 1808–1889. von ihm selbst verfasste Biographie. Basel 1902.

Literatur ändere

  • Romana Anselmetti: Merian, Amadeus. In: Isabelle Rucki und Dorothee Huber (Hg): Architektenlexikon der Schweiz – 19./20. Jahrhundert : Birkhäuser Verlag, Basel 1998, ISBN 3-7643-5261-2, S. 371.
  • Rose Marie Schulz-Rehberg: Architekten des Klassizismus und Historismus. Bauen in Basel 1780-1880. Basel 2015, ISBN 978-3-85616-643-4, S. 89–108.

Kwelle ändere

Fuessnoote ändere

  1. Der Rheinuferweg von St. Alban zur Rheinbrücke uf altbasel.ch, abgrüeft am 14. Februar 2016
  2. St. Albantor uf basler-bauten.ch, abgrüeft am 14. Februar 2016