Christoph Riggenbach

Dialäkt: Baseldütsch

Christoph Riggenbach (* 23. Novämber 1810 z Baasel; † 11. Juni 1863 z Baasel) isch e Baasler Archidekt gsi.

Biografii

dr Domhoof am Münsterblatz

Dr Christoph Riggenbach het zerst e Stäimetzleer gmacht. In dere Zit het mä Archidektuur nonig akademisch studiert, und er het sich 1832 bis 1834 bim Georg Moller z Darmstadt zum Archidekt lo usbilde. Bim Moller häi in de 1830er Joor e hufe jungi Archidekte us em ganze dütschsproochige Ruum gschafft. Im Summer 1834 isch dr Riggenbach au no an d Berliner Bauakademii gange, het druf e Joor z Münche studiert und het wien e hufe anderi Archidekte und Künstler in deere Zit en Italieräis gmacht. 1837 isch er zrugg uf Baasel.

Sini erste Geböid si vo dr italiänische Rönessans, em Quattrocento, beifflusst gsi, so zum Bischbil s Bachofehuus (1839–1841) und dr Domhoof. Gege d 1850er Joor si immer mee spiilerischi Elimänt vo dr Romantik die blockhafte, stränge Forme vo dr Neorönessans ufbroche, wie zum Bischbil bim Woonhuus an der Missionsstrooss (1850–1851). Spööter si neugotischi Forme drzue choo, wie bi dr Elisabethekiirche, won er noch Blään vom Ferdinand Stadler baut het (1857–65) und em Chliichinderschuelhuus nääbedraa. Aber mä cha doch äigetlig bin em nid vom ene Stilpluralismus im Sinn vom Historismus schwätze. Wääred sinere ganze Karriere isch er mit em Blaane vo de Baasler Spidääler beschafdigt gsi.

En Uswaal vo sine Wärk

• s Bärner Regierigsgeböid, Projekt, 1835
• Spidaalaalaage, Baasel, 1838–1842, 1857–1860
• s Bachofehuus, Münsterblatz 2, Baasel, 1839–1841
• dr Domhoof, Münsterblatz 12, Baasel, 1840–1842
• Socinschi Hüüser, Petersgraabe 27 und 29, Baasel, 1843–1844
• Woonhuus, Dalbevorstadt 16, Baasel, 1844
• s Neuje Kaufhuus, Barfüesserblatz, Baasel, 1844–1846 (1874 abgrisse)
• d Villa Solitude, Gränzacherstrooss 206, Baasel, 1845–1846
• d Siidebandfabrik, Dalbe–Kirchrain 10, Baasel, 1850–1851
• d Spalegottesackerkapälle, Baasel, 1850–1852 (1943 abbroche)
• s Landguet zum Obere Middlere Gundeldinge (Bachofeschlössli), Baasel, 1854 (1973 abbroche)
• d Elisabethekiirche, Baasel, 1857–1863

Litratuur

• Renaud Bucher: Riggenbach, Christoph 1810-1863: ein Beitrag zur Basler Architekturgeschichte. Bärn 1993. Usserdäm in: Isabelle Rucki und Dorothee Huber (Hrsg.): Architektenlexikon der Schweiz – 19./20. Jahrhundert. Birkhäuser, Baasel 1998, ISBN 3-7643-5261-2. S. 444 f.
• Schulz-Rehberg, Rose Marie: Architekten des Klassizismus und Historismus. Bauen in Basel 1780-1880. Baasel 2015. ISBN 978-3-85616-643-4, S.109-128

Weblingg

• Renaud Bucher: Riggenbach, Christoph. In: Historisches Lexikon vo dr Schwiiz.

Fuessnoote

Dä Artikel basiert uff ere fräie Übersetzig vum Artikel „Christoph_Riggenbach“ vu de dütsche Wikipedia. E Liste vu de Autore un Versione isch do z finde.