Dr Barfüesserblatz

Dr Barfüesserblatz (umgangssproochlig Barfi oder Seibi) lit im Zentrum vo dr Schwizer Stadt Basel. Acht Dramlinie gönge quer über e Blatz, wo eine vo de wichtigste Dramchnotepünkt in dr Stadt isch. Jedes Johr an dr Herbstmäss git s uf em Barfi Bude und Fahrgschäft.

Barfüesserblatz Barfi, Seibi
Blatz z Basel
Barfi
Basisdaate
Ort	Basel
Aagläit	Middelalter
Stroosse, wo in Blatz iinechömme	Gärbergass Falknerstrooss Stritgass Steinebärg Kohlebärg Steinevorstadt
Bauwärk	Barfüesserkiirche dr Samson und Delila-Brunne
Nutzig
Nutzergrubbe	Verkeer, Kilbi

Dialäkt: Baseldütsch

Dr Barfüesserblatz lit vor dr Barfüesserkiirche, wo hüte s Historische Museum dinn isch. In Blatz iine chömme d Gärbergass as eigetligi Dalstross vo dr Altstadt, d Falknerstrooss, wo 1900 us dr Birsigüberdeckig entstanden isch, d Stritgass as Verbindig zur Freie Strooss, dr Steinebärg und dr Kohlebärg, d Stroosse in dr Lag vo de Gräbe vom innere Muurering und d Steinevorstadt, d Basler Vergnüegigsstrooss, wo an dr Nummere Äis s Diddihuusmuseum dehäi isch und grad wisawii s Stadtcasino mit em berüemte Muusigsaal. En anderi Seenswürdikäit isch dr Samson und Delila-Brunne am Egge vo dr Stritgass.

Gschicht

Scho um 1100 het s am Blatz vo dr Barfüesserkiirche e Gwärbsiidlig ge, und er isch eine vo de vier Kärn vo dr Dalstadt, em Zentrum vo dr Stadt Basel, gsi. Im Johr 1256 het dr Bättelorde vo de Franziskaner, wo im dütschsproochige Ruum au as „Barfüesser“ bekannt gsi si, si Kloster am Blatz baut und em so si Name gee. Noch em Ärdbebe vo 1356 het mä dr Klostervorblatz e baar Johr lang as Märtblatz bruucht. Uf em Barfi het mä Johrhunderti lang mit Holz und Chohle und mit Säu ghandlet, und wäge däm het dr Blatz si Übername Seibi (= Säu-blatz) überchoo, wo hüte no bruucht wird. Noch dr Reformation isch d Umfassigsmuure vom ehemolige Kloster abgrisse und dr Blatz eso vergrösseret worde. Es isch woorschinlig 1529 gsi, wo me dr Birsig uf dr ganze Lengi vom Barfüesserblatz iidoolt het.

Uschnitt us dr Stadtaasicht vom Matthäus Merian em Eltere im 17. Joorhundert
Dr Barfi isch oobe in dr Middi vom Bild. Linggs am Blatz isch d Barfüesserkiirche (11) und d Geböid vom ehemoolige Barfüesserkloster. Am Barfi sälber het s kä Stadtdoor ghaa, z Fuess het mä aber dur s Eeselsdüürli bim Eeseldurm uuse in d Stäinevorstadt chönne.

Vom Johr 1758 aa isch er dr eigetligi Baasler Märt- und Mässblatz gsi.

D Herbstmäss uf em Barfüesserblatz

S Usgseh vom Barfi het sich im Johr 1821 markant gänderet, wo mä verschidnigi Klosterbaute samt dr innere Stadtmuure drnäbe und ihre Dürm abgrisse het. Dr Blatz isch so gege d Steinevorstadt offe gsi und s Gsellschaftshuus, s hütige Stadtcasino, isch baut worde.

Vo 1883 aa het mä uf em Seibi au Grosshandel mit Gmües und Obst bedriibe. Dä isch denn 1929 in die neu eröffneti Märthalle bim Bahnhof Basel SBB verleit worde.

Im Johr 1936 isch dr Blatz deilwiis abgsänkt worde. Gege d Barfüesserkiirche aane het mä e Stützmuure baut, wo dr Übername Klagemuure übercho het. 1979 het mä die Muure mit ere grosse Stääge ersetzt.

Quer dur e Blatz verbindet e Strooss dr Steinebärg und Kohlebärg mit dr Falknerstrooss. Uf em ganze Blatz git s keini Parkblätz für Auti.

Drämli

E Drämli uf dr Linie 11 am Barfüesserblatz

Dr Barfüesserblatz isch noch dr Haltstell Bankverein dr einzig Blatz z Basel, wo vo acht Dramlinie vo dr BVB und dr BLT bedient wird und isch dorum e wichdige Umstiigpunkt.

Linie	Dramlinie
3	Burgfälde Gränze ↔ Birsfälde Hard
6	Allschwil ↔ Rieche Gränze
8	Neuwiilerstrooss ↔ Chleihünige
11	St. Louis Gränze ↔ Aesch (BLT)
14	Dreirosebrugg ↔ Brattele
15	Mässblatz ↔ Bruederholz
16	Bruederholz ↔ Schiffländi
17	Wiiseblatz ↔ Ettige (BLT)

Litratur

• Geographischer Exkursionsführer der Region Basel, Wepf&Co. Verlag, 1980
• Eugen A. Meier - Basel anno dazumal, Birkhäuser Verlag Basel, 1980

Weblingg

 Commons: Barfüsserplatz – Sammlig vo Multimediadateie

Fuessnoote

47.5547222222227.5891666666667

Dä Artikel basiert uff ere fräie Übersetzig vu dere Version vum Artikel „Barfüsserplatz“ vu de dütsche Wikipedia. E Liste vu de Autore un Versione isch do z finde.