S Ärdbeebe vo Basel
| Dialäkt: Baseldütsch |
S grooss Ärdbeebe vo Basel vo 1356 isch s schterkscht Ärdbeebe in Middeleuropa gsii, wo gschichtlich dokumentiert isch. Dr Middelpunkt vom Ärdbeebe isch unterem Dorf Riinach im Baselbiet gsi, a baar Kilometer südlich vo dr Schtadt Basel. Am Nomittag vom 18. Oktober isch dr erscht Schtoss bassiert und s het no meh Schtöss gä bis am Nomittag vom 19. Oktober, wo Schäde bis zunere Entfärnig vo fuffzig Kilometer gmacht hei. Hüser, Chille und Burge in dr Schtadt und dr Umgäbig si zum Deil schwer beschädigt worde. Füür si usbroche und hei nit chönne glöscht wärde, wil die meischte Lüt us dr Schtadt und de Dörfer uffs offnigi Land gflüchtet sii. Das hett aber au villi Läbe grettet. Me het iigschetzt dass in Basel 300 bis 1000 Lüt umcho sii. Dass es nit mee gsii sin, isch druuf zruggzfüere, ass d Hüüser denn in Liichtbauwiis, mäischtens us Holz mit Schtraudächer, baut gsii si.
Bis öppe 1370 si die meischte Schäde in dr Schtadt scho gflickt gsi.
S Riinacher Dänkmol ändere
Zur Erinnerig an s Ärdbeebe het mä z Riinach e Dänkmol in dr Form vomene chrumme Chrüz uffgschtellt.
Wichtigi zerschtörti Gebäud ändere
- S Dach vom Basler Münschter isch zsämme gheit und s Füür wo usbrochen isch, hett während acht Dag brennt und alles zerschtört.
- D Burge uff em Wartebärg bi Muttez sii zerschtört worde und nie wider richtig uffbaut worde.
- Dr Durm, d Nordwand und s Dach vo dr Arbogascht Chille z Muttez si zerschtört worde. Dr Konrad Münch-Löwenberg hett 1359 agfange si z repariere.[1]
- S Dach vo dr Lütchille z Bärn—meh as siebzig Kilometer äwägg—isch iigschtürzt.
- D Burge bi Eptige, Ääsch (Münchsberg), Fränkedorf ( Alt-Schaueburg), Brattele (Madle), d Froburg bi Olte, und Waldegg si schwer beschädiget und uffgä worde.[2]
Quelle ändere
- ↑ Kunschtfüehrer: Dorfchille vo Muttez Archivlink (Memento vom 27. Septämber 2007 im Internet Archive)
- ↑ S grossi Ärdbebe vo Basel vom Johr 1356 Archivlink (Memento vom 15. Mai 2008 im Internet Archive)