Bruederholz

Bruderholz Quartier vo Basel
Flechi	2,60 km²
Iiwohner	8851 (Jan. 2003)
Bevölkerigsdichti	8851 / 2.60 Iiwohner/km²
Usländeraadeil	14,5 %
BFS-Nr.	2701-007
Postleitzahl	4059

Dialäkt: Baseldütsch

S Quartier Bruederholz isch e Stadteil vo dr Schwyzer Stadt Basel.

Laag

S Quartier ligt uf dr Grossbasler Site vo dr Kantonsgränze, südlig vom Bahnhof SBB in ere reizvolle Hang- und Hügellaag, uf em Bruederholz, eme Höhezug, wo sich vor allem im Baselbiet befindet und wo im Quartier dr Naame gää het. Es isch 259,61 ha gross und isch e bevorzugti Wohngegend, wo öppe 8900 Lüt lääbe.

Uf em höggschte Punggt vom Bruederholz stoht e 30 m hoche Wasserturm us em Joor 1925, wo öffentlig zuegänglig isch und vo wellem me e herrligi Ussicht uf d Stadt Basel het. E bitz näben em Turm ligt d Batterieschanze, wo 1815 vom Napoleon als Fäldbaschtion aaglegt worde isch.

Gschichtligs

Dr Legände nooch soll e Mönch vo de Barfiessermönch si Orde vorloh ha und in d Wälder usserhalb vo dr Stadt zooge sii. Döt häig er vo denn aa elei gläbt. Me vrmuetet, dass dr Naame Bruederholz vo däre Legände stammt.

Historisch isch s Bruederholz bekannt wägem Gfächt, wo dert in dr Neechi während em Schwoobekrieg vo 1499 gschlage worden isch. Z Riinech stoht s Bruederholzdänggmol, wo draa erinneret.

Am 12. Februar 2006 sin bin ere Volggsabstimmig zwei Zoneänderige abglähnt worde. Die hätte e 0,5 ha grosse Ackerstreife und e 0,4 ha grosse Aateil an Familiegärte in e Zone für zweistöggigi Wohnhüüser gänderet.

Vrkehr

S Bruederholz wiist e guet usbauts Stroossenetz und zahlrichi Fuesswägli uf. Mit de Drämmlilinie 15 und 16 und de Buslinie 37 und 47 isch s Quartier an dr öffentligi Vrkehr aagschlosse.

Geböid und Sehenswürdigkeite

• Tituskiirche
• Wasserturm Bruederholz
• Bruederholzspital