Bruederholz

Dä Artikel behandlet d Hoochflechi Bruederholz. Für s Baasler Kwardier Bruederholz gang doo aane

Dialäkt: Baseldütsch

S Bruederholz isch e Blatoo in de bäide Halbkantöön Baasel-Stadt und Baasel-Landschaft in dr Schwiz. Es isch äins vo de beliebtiste Woon- und Noocherhooligsgebiet vo Baasel.

Dr Wasserdurm uf em Bruederholz

Dr Naame chunnt vo de Waldbrüeder (Äisiidler), wo früener in chliine Ghölz und Wäldli an de Stäilhäng vom Bruederholz gläbt häi und wo bis öbbe 1600 die äinzige Lüt gsi si, wo uf em Blatoo gwoont häi.

Vo däm Blatoo het s südligste Kwardier vo dr Stadt Baasel si Naame überchoo, lueg Baasel-Bruederholz.

Geografii

S Bruederholz lit in ere nordöstlig-südwestlige Richdig und drennt s Birsdaal vom Läimedaal. Es ghöört zum Sundgauer Hüügelland und isch öbbe 100 Meter hööcher as d Dääler nääbedraa. Es isch liicht gwällelet und goot gege Süüden e chli ufwärts.

Dr Undergrund und d Daaalsoole bestöön us Cyrenemergel (Blaue Lätt/ Oligozän) us dr Terziäär. Drüüber het s Deckischotter (zum Däil Naagelflue) und as Deckschicht fiini, gälbligi Staubärde, Löss/ Lössleem us dr Iiszit (Diluvium). Die Deckschicht isch seer fruchtbar, und dorum het s uf em Blatoo fruchtbaari Äcker und saftigi Matte.

Gschicht

Am 22. Merz 1499 het doo wäärend em Schwoobechrieg s Gfächt am Bruederholz zwüsche de Schwoobe und de Äidgenosse stattgfunde.

Vo 1792 aa isch d Gränze zwüsche dr Äidgenosseschaft und em revoluzionääre Frankriich über em Bruederholz verloffe. Dr Wiener Kongräss het s Blatoo im Joor 1815 dr Schwiz zuegsproche. Mä het denn au e Schanze gege d Franzoose baut, wo män ere Batterii gsäit het.

S Bruederholz isch vo 1910 aa besiidlet worde, und 1915 het män e Dramlinie ("Basler Rigi") uf s Blatoo uufe baut. 1926 isch ganz in dr Nööchi dr Wasserdurm Bruederholz baut worde, wo mä vo witem cha gsee, und 1944 e Mustersiidlig vo dr Landgnosseschaft Jakobsbärg. Uf em Bruederholz stoot au äins vo de drei Spiddääler vom Kantonsspiddaal Baaselland (KSBL), wo im Merz 2012 entstande isch wo d Spiddääler Liestel, Bruederholz und Laufe veräinigt worde si.

Weblingg

 Commons: Bruderholz – Sammlig vo Multimediadateie

• Antonia Schmidlin: Bruderholz. In: Historisches Lexikon vo dr Schwiiz.

Fuessnoote

Dä Artikel basiert uff ere fräie Übersetzig vum Artikel „Bruderholz“ vu de dütsche Wikipedia. E Liste vu de Autore un Versione isch do z finde.

47.5166666666677.5833333333333350