S Basler Clara-Quardier


Clara
Quartier vo Basel

Charte vo Clara
Flechi 0,24 km²
Iiwohner 3787 (Jan. 2003)
Bevölkerigsdichti 3787 / 0.24 Iiwohner/km²
Usländeraadeil 43,1 %
BFS-Nr. 2701-013
Postleitzahl 4058
Dialäkt: Baseldütsch

S Clara, uf Stadtbaseldütsch Gloore oder Glaare, isch e Quardier in dr Schwiizer Stadt Basel. Es lit östlig vom Chleibasler Stadtzentrum und gränzt im Norde bi dr Sperrstrooss an s Mattys-Quardier, im Oste bim Riechering ans Roosedaal, im Süde bi dr Riechestrooss ans Wettstei und im Weste an d Chleibasler Altstadt (Klybistrooss, Claragrabe).

S Clara-Quardier isch mit öbbe 23,66 Hektare s chliinste Vierdel vo Basel. Es het si Name vo dr Clarachille und em Clarablatz, wo grad drvor lit, übercho. Die hai zum früehnere Clara Kloster ghört.

Vor 1870 het s nume wenig Hüüser im Vierdel gha, vor allem an dr Strooss uf Wiil, wo hüte Hammerstrooss heisst, an dr Clarastrooss und an dr Bahnhofstrooss, em hütige Riechering. D Bahnhofstrooss hätt sötte e Boulevard mit Bäum wärde, dä Blan isch aber nume grad in dr Nööchi vom Mässblatz Wirklichkeit worde. Bis zum Aafang vom 20. Johrhundert isch die ganzi Flechi vom Quardier bebaut gsi, usser dr Claramatte, eme rächteggige Park, wo me denn zum Deil in de 1950er e Parkblatz drus gmacht het. Vor Churzem het mä d Parkblätz wider abgschafft, so dass d Claramatte wider ihri ursprüngligi Flechi het. D Parkblätz, wo verlore gange si, het mä in en underirdischs Parkhuus verleit, wo mä uf em Gländ vo dr früehnere Bandfabrik Vischer & Co. baut het. S Zentrum vom Clara-Quardier, vor allem d Clarastrooss, het sich im zwanzigste Johrhundert zum e Gschäftsvierdel entwigglet und in dr Nöchi vom Riechering isch es Kongrässzentrum baut worde und es git e baar Hotel und e Hufe Restaurant.

Gebäud und Sehnswürdikeite ändere

Weblingg ändere

  Dä Artikel basiert uff ere fräie Übersetzig vum Artikel „Basel-Clara“ vu de dütsche Wikipedia. E Liste vu de Autore un Versione isch do z finde.